Sunday, October 7, 2007

خفو شوي يا صبايا




كنت قاعدة انا وصاحبيتي بالجامعة بعد الدوام بدي منها شغلة ,.. وهاي طبعا مستحيلة انو شو براء قاعدة بعد الدوام بالجامعة!!! .. وكنت احكي معها لانها البنت خاطبة فبتحكيلي انها بتلف على قاعات .. فدار بيناتنا النقاش التالي:

بس بالاول اللون الاخضر انا واللون البرتقالي هي واللون البنفسجي الفاتح دخيل ...


شو مالك مكشرة ولك افرديها ..

دخيل الله يا براء والله الواحد زهق مل تعب يعني بدي اعمل شي غير عن الناس مو عارفة


شو بدك تعملي يعني ؟؟ متل شو ؟؟

بدي اعمل عرس ما صار ...


حتفكري وتتعبي وتعبي اعصابك وبالاخير بعد العرس بتكتشفي انو هاي الفكرة انعملت .. مافي شي اسمو ماصار ..

ولك لا مو هيك يعني شي جديد

ولك مافي شي جديد .. العرس حلو لو مافي افكار بس الواحد يعني يعرف كيف يتصرف يعني ما تعجئي القاعة ما تعملي ما تسوي .. وانهلت عليها بالاقتراحات والنصائح تقولو انا الي بدي اتزوج ..

انا بدي صالة كبيرة وشفت صالة عجبتني كتير وهو ما بدو .
ليه ما بدو؟
غالية كتير كتير ما بقدر على تكاليفها ..

طيب خلص شوفي غيرها

ولك يا هبلة عجبتني هي احلى قاعة شفتها واقنعت نفسي فيها وما بدي الا هي
وكم حقها ؟؟

25 الف ..

ولااااااااااااااا اشي ... طبعا طلع الرقم من عيوني بستوعبش هاي المبالغ عشان ليلة .
ولك 25 الف حرام عليكي تعملي فيه هيك عشان ليلة وحدة يجعل ما حدا رقص ولك ولا قعد وتحملي فوق طاقتو ويبدأ يدايق ماديا عشان ليلة فرح فيها ولك باخدك فيهم شهر عسل و و و .. وبلشت اقنعها شو ممكن يعمل .. تقولو انا العروس ..

بدي بوفيه مفتوح ..

ولك مو قدرتو يعملك بوفيه مفتوح ..

افتتتت كلشي مو مو مو وما في ..
فجأة نطلنا واحد شكلو كاين سامع كل نقاشنا .. فبوجه حكي الي ..
والله كلامك مزبوط يعني ارحمونا الوحدة فيكم بدها وبدها وبنحمل حالنا ديون وفوق طاقتنا وبنندم بعد هالعرس وعلى شو على حفلة كلفت 25 عشان بوفيه مفتوح وعندك حليين يا بتفتحي بوفيه بيتكم :: ما ابيخك :: ويا بتعملو بالقاعة بوفيه مفتوح بس شو تطلبو فيه .. سندويشات لبنة ومشتقاتها .. ومتنوعة ها .. لبنة وزيت لحال لبنة وسنيورة لبنة وخيار لبنة وبندورة .


لووووووووووووووووووووول ما اهبلو ضحكني غصب عني .. هبل الي يهبلو ومالت عليه حيطة مايلة فوق ما هي شكلها مالت وخلصت ..



بس الفكرة وين ؟؟ انو يعني البنات هالايام وهاي تالت بنت من نفس النوع ما عم بتفكر انو والله بدي حفلة حلوة واكون مبسوطة فيها عم بتفكر بالمكان بدها بالشريتون وما بدها بغيرو وازا اتنازلت بتتنازل على واحد يمكن ارخص بدينارين .. والشباب هالايام مو كلهم قدرتهم يدفعو .. فيعني لو البنت الي كانت تدفع التكاليف كان زمان طلع موديل الصلع للبنات
ببشركم حنعنس كلنا شكلنا ازا بستمر الوضع هيك ..


وهي فساتين شفتهم عجبوني كتير هاي الصور هيك بحطهم على البيعة


26 comments:

Qwaider قويدر said...

اصحى يا نايم وحّد الدّايم
ثروات امّتنا بتضيع حفلات و عزايم
و عراس الها اوّل و ما الها آخر
و ناس بتيجي تسهر وبتطلع تنم
ناس ماتت من الجوع
و ناس عم تحرق زي البهايم
[more...]

Hani Obaid said...

Madness, I mean if they can afford it sure, do a big wedding, but if she wants to bankrupt the poor guy before they're even married, what's it going to be like later.

Doesn't she realize every Dinar they spend on the wedding is a Dinar they won't have later for the honeymoon, house, furniture, kids.

If I was him, I would cancel right there :)

Bos6ar Gadeem said...

الله يبشرك بالخير :-) ... هيك بطلبوا البنات هالأيام ؟ خليني أجيب مع وحده من هون وأريح راسي

والله هاي حسب القدرة والاتفاق .. يعني اللي معه يدفع هو حر .. بس بالدين؟ و مشان حفله ليله؟ كثير ... هيك و كمان هيه بدها تجبروا على الحفله ؟ .. كان لازم من الأول يحكيلها شو قدراته و شو بقدر يجيب و شو بقدر يعمل ..

و على فكرة ليلة العرس مهمه كثير بالنسبة للبنت ... بس اشي عادي بالنسبة للسب .. يعني معضم الأحيان بتفرقش معه .. بس البنات بدهم عرس ما صار دائما .. وحقهم انه يفرحوا بليلة عرسهم .. بس كمان ... على قد لحافك مد اجريـــك (يعني رجليك) ... و أنا شخصيا مش مستعد أتجوز بمبلغ على بالدين بدي 20 سنه اسده .. بس بالمقابل مستعد اسحب دم وأبيع مشان أجيبلها شغله تبسطها

Bahloul said...

والله يا براء أنا بعد هالحكي مش عارف شو بدي أقول... يعني هو أنا لازم يصير عمري 30 سنة أو 35 عشان أتجوز والله حرام عليكم، صراحة أنا البنت اللي رح تطلب مني هيك رح أحكيلها دار أبوك أولى فيك، أي أنا شب صاحبي اتزوج وعمل أحلى عرس وبفندق(مو ضروري يكون 5ستارز) وفرش بيتو أحلى فرش كل هاد ب 12ألف دينار، وبعدين هي الوحدة بتتجوز الزلمة ولا المصاري، أنا متأكد إنها كل ما راعت ظروفه رح يبسطها بحياتها أكثر، يا بنات الدنيا فانية واقرؤوا بالسير كيف كانوا أمهات المؤمنين، أنا ما بحكي إنو الوحدة ما تنبسط لأ أي أنا بدي أعمل عرس ما صارش زيو لعروستي هو أنا نقيتها من بين كل البنات عشان ما أسعدها وأبسطها خصوصا بأهم يوم بحياتها، بس برضو ضمن المعقول وأهم شي الفرحة يا جماعة إنها تدوم وما تكون آنية.

Tamara said...

أنا مش فاهمة ليش لازم العرس الي ما صار يكون كتير غالي ...يعني شويه إبداع بطلع العرس مميز\و مش كتير غالي ، أنا مثلا عملت عشاء في مطعم على أطراف عمان و قعده بره حلوه و الكل طلع مبسوط و كمان شبعان.

الله يعين الشباب على المصاريف !!
و يا ريت البنات يعرفو انو أغلى عرس في الدنيا مش حيفرق معها اذا ما نجحو بحياتهم مع بعض

Life said...

طيب و الخلاصة اقتنعت...؟
ما اعتقد تقتنع..
25الف حق عرس يعني مش هيك بصراحة.. تووو متش :) و هاد ابو حيطة مايلة شو دخل اهلو.. ليش راخي ادنو عندكم.. اما في شباب اتعس من البنات بهيك قصص :) بس ضحكتيني موت انتي و قصصك يا بنتي..
الفستاين عن جد حلوين.. عقبال عندك :)

Adoosh said...

الله يهدي هالبنات ويعين الشباب..
وبعدين في ناس بستغربوا ليش بنتي صار عمرها 26 سنة مثلاً ومش متجوزة! مهو طبعاً لو حضرتكم مش ناويين تكسروا ظهروا للعريس المفترض كان في مجال أكتر..

ولاّ مكتوب ع الشب مايتجوز إلا بعد ال 30 عشان يقدر ع جزء من هالنكبة! طب ماإحنا بني آدمين كمان وبدنا ننستر! ولا بس البنات!

sweetlikearose said...

qwaider:
loooooooooooooooooooooooooooooool
هادا انت ألفتو؟؟؟ هههههههههههههههههههههه كلام سليم
والله الناس بتضيع فلوسها على شي فاضي لو الواحد بس يفكر لقدام انو هالمسكين الحزين بدو يحط الفوقو والي تحتو عشان ليلة ويقعدها بالديون بتقوم هي بترجع بتفكر بطريقة صح .. بس لو بيفكرو ..

hani obaid:
u're 100% right .. She always dreams of a man with a white horse bla bla bla .. who will make her happy by letting a cloud of money rain over her head .. w 6ab3an no one does this unless he can .. bs most of the guys can't afford .. so b3omorhom elbanat ma betzawajo..
w betfash5aro w bel honeymoon beba6el m3ah .. la2222 heya betnaked bedha ykoon .. oft law eldenya mo befloos benkoon as3ad ..
welcome to u in my world and thank u for passing by
:: bakeet 3elket ya mar7aba ::

bos6ar:
الللللللللللله ... درر يا عمي درر ...
والله الصراحة نص بنات هالايام بدهم هيك طبعا مو كلهم بس انا معظم صاحباتي حكولي انهم بدهم هيك .. والي بيدرس برا وبيرجع بياخد من هالبلد؟؟ ما هو بيحكيلك زي ما انت حكيت اريح لراسي وراسها .. وبعدين شغلة الاتفاق لازمة بين الطرفين بس هو لما خطبها كان معو اكتر من هلا ما بعرف شو صار بطل معو كتير فلوس المهم هي بدها الحفلة المكلفة وهو بيحكيلها بياخدها على تايلند اسبوع كامل هبل الي يبهلها ان شاء الله ... :: ولي ازا بتقرأي اه انا حكيت هبل الي يبهلك ::
والمشكلة انو الوحدة لو تفكر فيها بتحكي اعيش مرتاحة ولا اعيش بتوتر بسبب الديون الي ركبها على حالو عشان ليلة عرس ؟؟؟؟؟
:: عقبلك ابو الشباب تورينا حفلة ماااااااااا صارت .. بس بعد ما تغير البسطار طبعا عشان ترضى البنت فيك :: واحد مو راضي يحل عنك ::

bahloul:
كلامك عنجد حلو .. ومتوسط عمر الزواج للرجال بيرتفع عن كل سنة وهلا وصل 30 بعدين بيصير 35 وبعدين بيبطلو بالمرة يتزوجو .. هو الصراحة اول شي الاوضاع مو مساعدة وتاني شي البنات مو مساعدين .. يعني مو عارفة اضيف على كلامك ولا شي لانو انت ما خليت مجال بهالكم سطر اضيف عليهم .. جد كلامك حلو ... واضافة صغيرة انو ياماخد القرد على مالو بيروح المال وبيضل القرد على حالو .. وهي بتحبو بس لما اخدتو كان غني وهلا كأنو امو مرضت او حدا مرض مو عارفة شو القصة المهم انو الي ما في خير لأهلو مافي خير للناس وهي اكيد حتتنازل بس بعد ما تكون سمتلو بدنو .. بتخيل حالي اني انا ابسط من اني اطلب واتفشخر .. فعلا الشاب بيضل حاملها للبنت انها بدأت معاه من محل ما هو كان وساعدتو مو جننتو .. السعادة الانية مجرد سراب ..
:: واحد بيصبلك قهوة لا تكسفو ::

sweetlikearose said...

tamara:
واااااااااااااااااااااااااااااو فكرت القعدة كتير حلوة .. والله .. جد العرس مو بكم حطيت فلوس بس ببساطتو وبالحب الي بيملى المكان .. بعرف ناس بس صراحة مو شخصي وهم من اغنى اغنياء السعودية حطو حفلة العرس مليون كامل للقاعة لحالهها وبالاخير بعد شهر اطلقو ..انو يعني انا متأكدة ندم خيرات الله هادا الشاب .. هو الله يبعد الطلاقات وهو مو حالة يعني دائمة بس ازا بضلها الوحدة مو خافة على زوجها اكيد مصيرها على بيت ابوها مباشرة
وشكرا لزيارتك
:: بكيت شكلاتة وسندويشة لبنة بسنيورة من البوفيه تاع الشاب الهبيلة ::

life:
ان شاء الله تكون اقتنعت .. هي لو بدها العريس ما يركب جناحات ويطير اكيد بدها تقتنع او تمثل انها مقتنعة بس الوحدة ليه تمثل؟؟ لا ما عنجد تنبسط ..
وتاع ابو حيطة مايلة ولك ما بعرف من وين طلعلي .. عامل شعرو صواريخ زي الي تقولي بيستعد للانطلاق هالشعر .. هبيلة وبيضحك ..
وفي شباب طبعا بحبو الاتيكيت والفشخرة بس لما يجي الموضوع على جيبتو بعيد التفكير بالاتكيت ست ميت مرة
والحمد لله انو عجبتك القصة والى اللقاء في قصص اخرى من عجائب البنات الي مابتنتهي ..
:: علبة كتكات وعصير ورشوة جبنهم سندويشة لبنة بسنيورة وهي بفيه مفتوح ::

adoosh:
بالاول انا ما نسيت الي خصمتهم علي رجعهم هاتهم .. حلوة هاي بدي اشتري اواعي العيد .. ليه الكل يعيد الا انا مثكينة ما عندي اواعي للعيد وما في فلوث اثتري ..طبعا شغلة اتمسكن للتمكن تسدقنيش بس ..
نكبة؟؟؟؟؟؟؟ لوووووووووووووووووول هههههههههههههه راح تصير نكبة ... وفعلا الله يجعل البنت الي بدها تجنن وتشرط وتتشرط ما تزوجت خليها عند اهلها .. والله البنت الي مو مادية بتريح حالها وبتريح زوجها واهلها كمان ..
على البساطة البساطة يا عيني على البساطة
:: كيس شبس ليز ديلايتس وحبة شكلاتة وحدة وبس من هون لترجعلي الفلوس الي خصمتهم ::

darkrain said...

البنات هبل
الرجال بستاهلو
صفي انو الواحد همو كيف يبين قدام الناس وكيف يكون احسن من فلان
بطل هم الناس الفرح، زمان كان العرس اسبوع وكل الناس تشارك فيه وما حد يزعل من حد
اليوم العالم بدو حرق
وانشالله يا رب ما يتغير تفكيري واصراري على عدم الزواج
لك تضربي انتي وصاحبتك عملتلي ازمة نفسية
ودمتِ

vagueraz said...

و الله يا براء كلامك مزبوط :)
يعني أنا ضد المصاريف إلي ما إلها داعي بالعرس ... و البوفيه حرام نص الأكل بينكب ..
و بعدين ليه يحمل الواحد فوق طاقته
عشان شو ... ؟؟
أهم شي يكونوا الإتنين متفاهمين
و مبسوطين .. و الله بكفي ...
و بوفر الفلوس لأشياء تانية ...

sweetlikearose said...

darkrain:
اناااااا؟؟ شو زنبي انا؟؟ حرام عليك يعني انا بدافع عن الرجال وبحكي حرام عليهم البنات ... وفكرة انو الشاب ما يتزوج صار في كتير شباب هالايام بحكيلك انا مابدي اتزوج ولا بدي افتح بيت .. الله يعين ..
وانا بشوف انو حفلة الاسبوع حلوة وعجئة وهيك بس والله متعبة جدا .. انا يوم واحد والي هو العرس وبتعب كيف لو كان اسبوع رايحة جاي على اعراس هالناس؟؟
:: واحد بيحكيلك طول بالك وبيعطيك زيت سمك اسمعت انو بيطول بس والله راحت علي ::

razan:
اهلا اهلا .. وين هالغيبة .. نور المكان ..
الصراحة انو الناس هاي الايام بس بدها تورجي غيرها انو والله معهم .. وبدهم يتفشخرو ويسرفو .. بس لو فكرنا بشغلة البوفيه المفتوح فيعني بدل ما يعمل ويكبو خلص ممكن يستفيد من الفلوس بشي لمصلحتها .. كيف الناس بتفكر ما بعرف .. بس الله يعين الشباب على اوضاعهم وان شاء الله اهل البنات انو يخفو شوي بطلباتهم ..
:: بكيت شكلاتة زاكي كتير ::

Bahloul said...

قهوتك مشروبة...وابشري باللي جيتي في... أي كم براء عنا....

Mala2e6 said...

خمسة و عشرين الف عشان فلان ياكل و يبلبع و فلانة تروح بالعرض اكتر و بالاخر بيطلعوا بيحكوا عالعرسان

احكيلك اكم قصة سمعتهم

مرة ناس من الاغنياء فوق العادة
كان تضييف العرس دنانير دهب عالطاولات لكل مدعو و مدعوة
طلعوا الناس حكوا عليهم

عرس تاني
كلّف مليون دينار

العرسان تطلقوا بعد سنة

الفرح حلو و انه الناس تتشارك مع بعض و ينبسطو حلو بس و الله مع هالغلا صار اللي بدو يتجوز بيلزمة مءات الالوف لانه العروس اللي بدها عرس يغني في عمر دياب(بياخد خمسين الف او اكتر بالعرس) و ترقص فيه دينا هي كمان 30 الف
اكيد العروس بدها فيلا مش شقة
و اكيد العفش من برة الاردن لانه اللي هون يع

النتيجة

اللي باب بيجوزه بابا بيطلقوا

اللي ما بهمها انه زوجها المستقبلي يتداين عشان هية تتفشخر
معناتو الكتاب مبين من عنوانه

كان جدي يقول اللي بيتجوز بالدين بيجو ولاده بالتقسيط

ولا عمري فهمتها بس شكلها حكمة

انا رايي البنات و الشباب يعملوا اتفاقية تنشر بالصحف و يوقع عليها الكل

ما عم بمزح


لما يكون في اتفاقية بين الكل ما حدا رح يحكي على حدا و رح يكون الاشي الطبيعي انه يتزوجوا باحتفال بسيط و بلاش خالتو ابتهاج و تانت سميحة يتبلعسو كيك

Qwaider قويدر said...

انا قررت اعمل تذاكر و ابيع قبل العرس :) اللي بدّو يجي .. يدفع تذكرة .. :) و مدام رح يحكو هيك هيك ... اعطيهم شي يحكو عليه

آه انا كتبت الكلام اللي فوق.. انتي ليش مستقلّة فيي يا بنتي؟

البنت بتعتقد انه العرس بيقدم او بيأخر.. او انه جالب السعادة.. و الشب مسكين .. بدّوا يرضي عروسه... مهي ليلة ...
وهاد هية المشكلة.. ليلة...
لأ مش ليلة ... ليش ما يكون كل العمر .. ليلة عرس؟

sel3 said...

guys will love you for this post! yes it costs a lot to get married these days and most of the expenses are not justified, too much.

sweetlikearose said...

bahloul:
الله يسعدك يا خوي يا بهلول .. يعني ما كسفتني وشربت القهوة وعشان هيك بدي اعطيك جائزة .. شو بدي اعطيك؟؟؟
حبة تمر زاكي فاخر :: واحد بخيل الا شوي ما تفهمو صح ::

mla2e6:
اهلا اهلا نور البلوج بوجودك زمان عنك يا بنت الاجاويد .. وين هالغيبة ..
لووووووووووول يا ملائط على الي بتروح بالعرض .. حاسيتك بتحكي عني :: واحد عامل حالو مالو دخل ::
ولووووووووووووووووووووووووووووووووووووووووووووووووووول على "اللي باب بيجوزه بابا بيطلقوا

اللي ما بهمها انه زوجها المستقبلي يتداين عشان هية تتفشخر
معناتو الكتاب مبين من عنوانه

كان جدي يقول اللي بيتجوز بالدين بيجو ولاده بالتقسيط "
تحشيش انا حششت .. من وين جايبة هالامثال .. هههههههههههههه ..
مثل على الوجع والله ...
:: فهميهم يختي فهميهن ما بيفهمن مصلحتهن .. والك كيس شبس مو مأكول منو ولا شي ابدا بس انا باكل حبة بس انتي تفتحيه ::

qwaider:
لوووووووووول انت الي كتبتو؟؟ ماشاء الله روعة كتير .. تحشيش الكلام وعلى قافية حلوة كتير وعلى الوجع كمان ...
ولوووووووووول على التزكرة .. فكرة جهنمية عبقرية قويدرية رهيبة ...وبحق التزاكر بعمل عرس ولا بكون ربحان .. عقل تجاري بحت .. بهنيك على هالفكرة .. بس بئسفني ازفلك خبر مو حلو ... ما حدا حيجي على العرس .. واهلك بيجو على حسابك واهلها كمان على حسابك ... ان شاء الله ما تصفي خسران ...
:: تزكرة لعبة بالملاهي احسنلك من مية عرس وعلى حسابي وبفضل تكون العروسة لانو احنا بسيرتها ::


sel3:
poor guys .. allah ykoon m3ahom ...msakeen .. elhom rabna .. sho bedak te3mal .. don't feel love w 5alas :P

Bos6ar Gadeem said...

والله اذا العريس ساوالها البحور مقاثي أثناء الخطوبه:12 أسبوه شهر شهر عسل بسنغافورة و تايلند و الهند ... و خاتم مرصع أبصر شو .. و حفله بالمريديان - فرع أيدون ... و من هالقصص .. فبكونوا بضحكوا على بعض من أولها

بعدين أنا ما راح اتجوز من هون .. لو بدي اتجوزت من زمان .. ما فيه مثل بنات بلادنا .. وراح أعمل عرس تقليدي .. لمبات و تعليله و دبكه و غدا مناسف .. اذا الله قدر .... بلا فنادق بلا بطيخ.. و شهر العسل على شلالات نياغرا أرخص من تايلند
:-)

nasimjo© said...

بلا بلدي بلا هم ... ما في بعد المستورد

hisham said...

7ekam wallahi

sweetlikearose said...

bos6ar:
الله يرفع من معنوياتك متل ما رفعت من معنويات بنات العرب انو لسا في ناس بدهم عربيات وهم هناك .. لووووووووووول الله يبعتلك وحدة تهنيك ..
والعرس حلو كتير انو يكون بسيط ما في داعي للفشخرة لانو على قول الجميع يعني الناس حتحكي حتحكي المهم احنا .. وبالنسبة للعزايم تاعت العرس انا بعتبر هاي العادة على قد ما هي حلوة بس كتير صعبة ومتعبة .. اما شهر العسل فنفسي اعرف ليه بسمو شهر وهو ما بتعدا كم يوم ؟؟؟
:: واحد عم بيعد الايام على ايدو ::


naseemjo:
لوووووووووووووووووول بلا بلدي بلا هم؟؟ حرام عليك حاسيتك عم بتحكي عن لحمة ... :)
ثانك يو فو بايسنج باي :: بكيت علكة ::

hisham:
يس والله حكم :)

Bos6ar Gadeem said...

6ayb lageeely 3rooos zay ili bil swar :-)

sweetlikearose said...

bos6ar:
والله مليان عرايس حلوات انت بس شد حيلك بتلاقي .. وانا ما حطيتهم عشان تطلع عليهم هم انا عشان الفساتين ..
:: واحد رافع حاجب ومنزل حاجبو التاني وعلامات الاستغراب تطير فوق رأسه ::

Qabbani said...

هاد السبب يلي بخليني اقتنع اكتر انه اعمل عرسي بالشام

sweetlikearose said...

ليه شو في بالشام شي مميز مو موجود عنا بالاردن ؟؟
ببشرك كلو واحد :)
:: واحد مبسوط على هالخبرية ::

Qabbani said...

في اكتير اشياء مميزة :)

على الأقل اكتير بنات ما بطلبو , و الصلات وتكلفتها اقل من هون بكتير كمان بعدين بضل بلدي يا بلدي