Friday, September 14, 2007

راس مالها عليه ...


انا من النوع الي ما بحب ينزل على السوق كتير .. صراحة زمان ما كنت ارضى انزل ماما كانت تجيبلي على زوئها .. والمصيبة قال احيانا ما يعجبني .. هلأ هاي الايام بحب انزل على السوق .. لاني بحب اشتري اشياء جديدة وحلوة ..

قبل كم يوم نزلت على السوق ... وطبعا دخلت على هالمحلات وطلعت على هاللبس .. طبعا انا هاي السنة حاسة في تشكيلة منيحة من اللبس غير عن كل سنة .. زمان كان اللبس موحد ... بتدخلي على المحل كأنك داخلة على الي قبلو والي بعدو .. لا هلأ خفت الحالة وصار في كتير تنوع وهيك احسن .. المهم .. عجبتني بلوزة كتير كتير حلوة .. قستها .. طبعا البياعين بدهم يبيعو وانا ما بدي الا البلوزة
... اجى الزلمة بحكيلي شو بدك معها؟ حكيتلو ما بدي اي شي خلص بس هي ..

- طيب يختي ما بدك معها بنطلون جينز؟

- لا والله انا عندي بنطلون جينز

- لا ما هي اللبسة حلو كلها تكون جديدة عشان تبهج

- ما انا اشتريت البنطلون قبل كم يوم

- لا بس يمكن لونو ما بيلبء على هادا اللون يعني مو جاي من الدرجة

-انا :: اهلين عمي ماشاء الله عند اللزوم بصير منسق ورود :: لا بلبء هادا جينز

- طيب ما بدك شي تاني؟؟ شوفي هاي القطعة وصلتنا اليوم تشكيلة واسعة والوانها بتاخد العقل وبعدين لابئة على بشرتك هيك عليك بتطلع كتير حلوة ..

- انا اطلعت فيه وبحكي بعقلي :: اكسكيوزموا :: لا ؟؟

- لا بس كم بتحسبلي هاي القطعة ؟؟

طبعا انا ما بعرف افاصل ولا بحب المفاصلة .. بس انا ما بدي البلوزة طبعا تكون غالية ..

حكالي هاي البلوزة ب 15 والك ب 12 عشان نكسبك زبونة .. ولا احكيلك !! .. خديها ببلاش .. :: نفسي اخدها ببلاش عشان اشوف ردت فعلو يمكن يسخن وياخدو على المستش حرارة :: فأنا ما حاولت اناقشو ...

لحالو فجأة حكالي : يختي اقل من 12 انا خسران .. راس مالها علي 10 ... حكيتلو اوكي .. حطيتها على الطاولة ورحت اشوف قطعة تانية لفتت انتباهي .. اجى حكالي خدي قطعة تانية بحسبلك اياها ب 8 .. :: واااااااات؟؟ ولا اشي من 15 نزل ل 12 وبعدين نزل ل 8 شو قصتو هادا؟؟ :: .. قلتلو والله ازا عجبتني قطعة :: استنو استنو بستهبل علي بدو يطلع حقها بالقطعة التانية مفكرني هبلة بس يالله كيف بضحكو على العالم :: فاتت هالزبونة عندو ووقفت على الطاولة وانا كنت عم بقيس جوا بلوزة تانية ... وصاحبيتي واقفة بتستناني .. طبعا الزبونة عجبتها البلوزة الي انا بدي اشتريها .. وسألتو هاي لحدا .. حكالها لاء بدك تقيسها فوتي ... طبعا فاتت وقاست وانا صرت طالعة وبدي خلص اخد البلوزة واضل طالعة .... وين البلوزة؟؟

اي بلوزة؟

الي انا قستها قبل شوي؟؟

اه ما انت ما بدك اياها .. اعطيتها لزبونة تانية .. ووطى صوتو طبعا وهو يحكي ..

اه اعطيتها لحد تاني يقيسها .. طيب ما صار الحكي اني بدي اشتريها منك .. ؟؟

لا ما بدك اياها ما صار ..

ايوااااااا ... لسا بدي اكمل حكي طلعت البنت بتحكيلو بتاخد العقل بدي اياها ... طبعا انا ازا ضل براسي عقل تعالو واجهوني .. يعني بعد ما لفيت لفيت وهادا كان المحل القبل اخير بفوتو وخلص تعبت ولقيتها هي الي بدي اياها تيجي وحدة تقيسها وتعطيها اياها .. انا قلت هلا بستحي على وجهو يعني ما استحى قبل شوي هلا بستحي .. وابدا نزلت البنت تفاصلو فيه ... انا كان بدو يعطيني اياها ب 12 وازا بشتري شي معها بعطييني اياها ب 8 .. بس شوفو الوقاحة عينك عينك ... فاصلتو البنت واخدتها بتمنية والله بتمنية .. وحطها قدامي بالكيس واعطاها اياها وانا واقفة انا بطلع هيك مصدومة انو شوالي صار هلأ بالزبط؟؟ وبس طلعت البنت انا سكتت هيك وحملت حالي وبدي اطلع مباشرة ولا بدي احكي معاه ولا كلمة .. والا هو بيحكيلي خدي قطعتين من المحل وبحسبهم التنتين عشرة .. حكيتلو لا ما عجبني شي غير البلوزة ...

لا يختي خدي والله جد بحكي انا اسفة بس هاي زبونتنا وانا ما بقدر احكيلها لاء يعني .. شايفة البلوزة والجينز الي هي لابستهم هادا من عنا الشهر الماضي اجت اخدتهم .. :: وبلش عاد خرط :: اها

لا مو مشكلة انا اساسا خلص طلعت من نفسي من اول ما اعطيتها للبنت تقيسها صراحة مو زوء ابدا الي انت عملتو .. وبعدين انا كنت ماخدتها منك ب 12 وانت بعتها بتمنية ... راس مالها عليك 10؟؟ اه كتير 10 معناتها خسران ... بس انا عارفة بعتها وانت بتضحك لانك مو خسران ابدا ...

يختي حقك علي والله ما بعرف انك انتي بدك تزعلي كل هالقد ..

لا ما زعلت بس ما كانت زوء منك ... كلها خلقت بلوزة ...

طيب اشتري الي بدك اياه من المحل بحسبلك القطعة بخمسة

مسكت حالي وطلعت انا وصاحبيتي وحكيتلو لا عجبني المحل ولا الي في المحل .. وطلعت :)

عنجد ما بستحو وهاي مو اول مرة موقف متل هادا بيصير .. اه يمكن لأنو هديك البنت من دون هدوم .. الله يخزيهم بس ..

26 comments:

Qabbani said...

:)
هههههه , الفكرة لازم تشتري اكتر من قطعة مشان يضيع السعر .. بس انه يخلي حدا يجرب القطعة ابل ما تخلص منها الوحدة

إلهة زوق اكيد يلا المهم ما شتريتي شي ؟ من عند حدا تاني

Noura said...

بتعـرفـي الشغلـة الـوحيـدة اللـي بحبهـا بهـالبلـد انـو كـل شـي مسعـر و مـا بـدك لا تفـاصلـي و لا تشـارعـي
..
One thing use to really bother me in Beirut is certain shops fold the items on shelves and you have to ask the owner to bring down certain colors or sizes..so I use to feel guilty and have to buy just because he brought down and unfold so many items.Here you go in and you don't have to talk to anybody:Pick, try and pay..
When you say that a blouse cost approximately 15,how much is this in dollars??? just out of curiosity:)
طيـب و بعـديـن اشتـريتـي شـي مـن غيـر محـل؟؟

sweetlikearose said...

qabbani:
على كيف ابو اشتري اكتر من قطعة؟؟ لما يكون جوا محلو اشياء بتنشرى والله ماعندي مانع ازا كنت محتاجيتهم اما انا ما بحب الي بيضحك عليك عينك عينك هبل .. لوووووووووووووووووول
وبعدين لا ما اشتريت تخيل؟؟ دخلت اخر محل وما عجبني عندو شي وروحت خلص كنت تعبانة..

noura:
لما يكون السعر واحد كتير احسن .. صراحة انا ما بحب الاشي الغالي كتير خلص هيك من طبيعي مو بخل بس يعني ما الو لزوم ... بس يعني هاي عجبتني كتير ... وال 15 يعني مو شاطرة بالحسابات والعملات بس كل 70 قرش اردني دولار امريكي يعني شو بيطلعو؟
وبعدين انا ما بحب اغلب حدا بطلع من بعيد لبعيد الا ازا عجبتني الشغلة بخلي ينزلها واشوفها وازا ما عجبتني خلص برجعها بس ما بعفشك المكان وبطلع الحمد لله انا زبونة عاقلة :)
اما انتي عملتك مو عملة :/

Adoosh said...

لووول يراء, أكلتي فلم محترم! لو محلك باخد البلوزة قدام الزبونة بس جكر...

أنا من لما اشتغلت بطلت أشتري أواعي من هالبلد, لإنو قرف ينزلك ألف قطعة ويقعد ساعة يقنع فيك وساعتين تفاصل وبرضو بتحس إنك طلعت مغلوب..

صرت لما بدي أواعي أأجلها عبين مايصحلي طلعة ع الرياض أو ع دبي..
هناك بتفوتي ع محل طويل عريض وبتقعدي ساعة تلفلفي وتتفرجي وتقيسي براحتك ماحدا بحكي معك, وبس تخلصي بتروحي بتحاسبي ع الكاشوالسعرواحد للكل..
يعني أريح بمليون مرة..

Maioush said...

ya3leana... zaman 3an hal ayam!! betsad2i ana a5er fatra sort akrah el nazleh 3ala soo2 b amman la nafs el sabab, ana ma eli toolet bal 3ala el mfasleh o sammet el badan.
hon bad5ol bte3jebni et3a, ba5odha o batla3, wala mfasaleh wala 7asheesh :D
yalla baseeta, inshalla tla2i a7la menha

Bos6ar Gadeem said...

براء
زي ما حكتلك نورا
أحلى اشي هون انه كل شي سعره عليه .. وكل شي سعره فيه ... و كل قطعة .. بتوخذ سعرها حسب الموسم .. يعني لما بصير تنزيلات .. أحيانا بتكون مش كثير حقيقية .. بس أحيانا بكون الفرق بالسعر كبير و ملحوظ

و كمان هون لو بتقيسي 300 قطعة و ما بدك تشتري غصبن عن أبوه البياع بده يبتسم و يحكي هلا عمي

بس هاذا البياع ما فيه منه .. كيف هيك بقلب؟؟ لو محلك بوقعلة بترينة العرض و بفل

تعيشي و توكلي كمان مقلب

Bahloul said...

هوه الصحيح إنت غلطانه....ليش!!! أنا بحكيلك إنت لازم تتعلمي المفاصلة في المحلات اللي ما عندها فكسد برايس... يعني قلك 15 قوليلو 7 هو أكيد رح ينجن بس بتشوفي إذا ما أعطاك ياها هيك... صراحة تجارنا مش مستغلين لأ .... هذول حرامية.... طبعا إلا من رحم ربي...

sweetlikearose said...

adoosh:
طيب انت بتسافر على الرياض ودبي وبتشتري اواعيك من هناك طيب وانا الحزينة الي بسافر على الجامعة وبرجع من وين بدي اشتري الاواعي ازا ما سافرت؟؟ طبعا من هالسوق المحرز .. يا عمي ناس من وين وناس من وين؟؟
وانا بتمنى انو عنجد يكون السعر موحد وخلص نخلص من كل سمة هالبدن
اشكرك على رفع معنوياتي بالرياض ودبي بس للأسف المعنويات خبطت بالسقف :)

maioush:
لسا بدي اكره نزلت السوق؟كرهتها وخلصت منذ قديم الازل ..
وان شاء الله الاقي احلى منها امين :: واحد بيدعي بشدة العيد قرب وعرس ابن خالي كمان ::

لووووووووووووووووووووول هههههههههههه حلوة هاي بوقعلو الفترينة وبهرب هههههههه كان لازم اعمل هيك .. والله هادا الي صار يا بسطار قديم .. صحيح بتبيع بسطارك ولا مصر بعدك بدك اياه؟؟وبإديش؟؟ واتمنى تعطيني راس مالو عليك من غير مفاصلة ..
:: بسطار جديد بلمع نضيف وحالتو فول اوبشن ::

bahloul:
فعلا .. حرمية طراز اول دون منافس ومعهم ايزو 9002 حرمنة وحمرنة وكل شي .. مزعجين .. استغلالين بشكل .. برمضان والعيد السعر بيرتفع متل الصاروخ بس بعد هيك بصيرو يشحدو من شان الله فوتو اشترو الي بدكم اياه بس خلونا نبيع قطعة وحدة بس .. انا عارفة ..!! بعدين انا جد بتعب من المفاصلة لاني لو بدي افاصل بخبص الدنيا تعال شوفني بس ..
:: واحد بفاصل انو 1+1 مو 2 ومصر كمان على رأيو ::

Bos6ar Gadeem said...

غالي و الطلب رخيص .. فكرتك طنشتيني مش حاطه اسمي بالرد ... بس الحمد الله بقرا كل شي

صاحب البسطار على حسابك

بس البسطار لأ

:-)

sweetlikearose said...

bos6ar:
سوري هادا سقط اسمك سهوا وليس عمدا .. وبعدين حلوة هاي صاحب البسطار على حسابك بس البسطار لاء؟؟ لهالدرجة زكرياتو عزيزة وغالية؟؟
طيب هاتو خلينا نغسلك اياه ونحط عليه بويا ونزبط وضعو على القليل يا سيدي ما تشتري واحد جديد ...مسامحينك ...
من زمان بدأت معك هاي الاعراض :)

vagueraz said...

yala ya sety 5erha b '3eeerha :)
amma eno zooo2 ,,,y3ni keef bdo yksabek zbooneh b hay el 3amleh :)
nahfeh ,

mnosh said...

جد انو وقح! قليل ذوق كمان!

المحلات الي البضاعة مسعرة اريح بتاخدي حسب مصرياتك وما حدا بسترجي يحكي معك!!

sweetlikearose said...

razan:
يييييييي يعدمني اياه ,.., عمري ما امر من محلو ان شاء الله .. وفعلا يمكن خيرها بغيرها .. وما بدي لا اكون زبونتو ولا اشوفو اصلا ..
فتت اليوم على موقعك :: واحد شايف حالو ومبسوط انو فات على موقعك ::


mnoshe:
شفتي شفتي؟؟ بيرضيكي يا منوشي الي صار معي ؟؟ والله اكسرو والله اشتري شكلاتة احسن من ميت بلوزة .. مزبوط ولا لاء؟؟
يا شوفيه وكسريلو راسو :(

Naryat said...

::wa7ad mf2oos o 5doodo mdandaleen::
ana bakrah el soo2 men kotor ma ba7es 7ali 5aroof bs 2koon bedi ashtari eshi!!
bs enno had el dokkanji mesh m32ool! wege7, wege7 el3aaadeh!! shu had!
law menni o mennik badrobo! wops! enti bannuteh lol
l2bas jad enti 7akeeti m3o kteeeer b2adab, kan lazem tbahdeleeh... (3a2sas eno b3raf abahdel y3ni... ma ana an2a7 mennik lessa!! :-p)

Wedad... said...

LOL sho nawari :D

yalla insha'Allah betla2i a7la mnha b meet marra

sweetlikearose said...

naryat:
والله انا ليه اعلي صوتي بالسوق واصرخ على شاب وابهدلو عشان خلقة بلوزة وعشانو قليل ادب وزوء؟؟ ما هو قليل ادب وزوء يعني حتفرق معاه يعني البهدلة؟؟ لا خلص انا بمتل هيك امور بحترم حالي وبطلع اول على اخير محلو وهو حر مين بدو يبيع .. اما هو حستحي من حالو على الي عملو وانا متأكدة انو اسحتى .. لغة الضرب ممنوعة :: واحد بهدد ::
اما شو قصة الخرفان؟؟ تسمعيش حدا انك بتصيري زي الخروف ترا عيد الاضحى مو مطول... :)
اسمعي فتي على الكومنتس تاع البوست الي قبل هادا؟؟ فوتي :)

wedad:
looooooool baref.. a na hala2 sar lazmne blozteen mo wa7de :( enzalo eshtaro 3ane :( :: wa7ad betmaskan la 7ata yetmakan :P ::

Maher said...

LOL 6awle balek Bee.

aslatan..(aslatan??) '7esrek el ma7al ka zboneh :P

btw, my brother gets his clothes online, and they are all lovely!

wonders said...

i am sorry but it is funny sweety :). y3ne hl 2d bfakro el nas habayel??

btzaker fe saneh men el sneen kont aro7 el jam3a o a7es 7ale lesa bl madrase... kol el bnat uniform mwa7ad!!

a7san eshe lama ykon fixed pricing...

sweetlikearose said...

maher:
ana m6awle bale Mee wallahe ..
bas bede ahtare she 2abel eljam3a 3ashan bokra 3nde jam3a :( ba7eb albas she jded :)
kef eljam3a sa7e7??
w ba3deen ana jarabtha el online .. 3ejbe 3ejbe 3lai ma belba2le ana :P
w kaman aslatan ho 5esrerne ah ..:: allah yerfa3 mn m3naweyatak :P ::

wonders:
first, ahlan w sahlan wen hal3'ebe?? zman 3nek ya 7elwe .. second, ana ma befta7 3nde nos el blogs ma ba3ref leh .. my PC bedo takseer ras :P
a5er she be5e6ab elyoom eno el fixed price a7san 3la 3ene bas e7na ma e5talafna 3la else3er ma e5talafna 3la she wallah leh ya3ne faj2a a36aha la7ad tane?? mskeen mareed nesa sheklo :)
w looooooooooooool 3la el uniform hehehehe
:: 7abet tamra w dalayet 2ahwe be7alha ::

Bos6ar Gadeem said...

هاذا البسطار قيمته بالغبرة اللي عليه

قال بويا و تلميع :-) .. لأ بلاهم .. لا تنزعي منظره


أي أعراض؟ قصدك أعراض الحب ..؟ لأ هاي جديدة .. بس من لما تعرفت عليكي
:p

sweetlikearose said...

bos6ar gadeem:
لووووووووول وبعدين معك يا زلمة .. خد واعطي .. شو قيمتو بالغبرة الي عليه ؟؟ الناس كل شهر على الراتب بتنزل تشتريلها بسطار جديد ..
:: صيغة مبالغة اقناعية ::
بس ازا ما بدك تشتري واحد جديد ولا بدك نحطلك اياه بالغسالة ولا نلمعو ولا نصبغو بالبويا ... الله يسعدك حطو على الرف زينة .. لا تطلع فيه مشوار .. :)
والاعراض يا فهيم مو اعراض الحب .. اعراض العناد؟؟؟؟؟؟؟؟؟؟؟؟؟؟؟؟؟
:: حبتين تمر خبيهم للإفطار وكمان كاسة عصير فيمتو بحبو انا ::

Sel3 said...

the most thing I used to hate when shopping in jordan was when the salesman show me an item and i don't like and he says it is the latest fashion! walak yen3an yahoodak is it supposed that all people dress the latest fashion? ana ma ba7eb akoon 3al moda! hada 3'air 3an enno dayman ba7es 7ale ma3'loob bel se3er!

Bos6ar Gadeem said...

حراح عليكي .. هسا أنا عنييييييييييييييييد
:عيووووط: + :واحد أبوه لاحقه بعصاه: ... والله لو لحقتبني أيام صغير شو بتقولي؟ كان يسموني: دقــّــر .. يعني الولد الدقر .. بس هسا عقلت .. والبسه بتوكل عشاي .. يعني اللي بتتجوزني راح تحكمني


و خلص ولا يهمك البسطار بحطه عالرف .. ولا عاد ألبسه ... خليه ليوم ما اتجوز

sweetlikearose said...

sel3:
انا دايما مغلوبة ... قال بدخل على المحل بكل ثقة بحكي يا غالب ويا مغلوب بطلع شو؟؟
احكيلك هدول غالبين بكل الحالات ... لما القطعة يشتروها بالجملة ويكون حقها دينارين .. هاي يا سيدي راس مالها وفي ناس حلفو انو راس مالها بيكون 60 قرش .. وبعدين بتنباع بأقل شي 10 طيب هادا مو ربحان؟؟ لا عمي انت مغلوب مغلوب مافيها هاي .. وفعلا الموضة مو حلوة .. انا كره حياتي يحكيلي هاي قطعة وصلتني اليوم وانا بكون مارة من عندو قبل يومين وشايفتها على المنكانة .. يخرب هبلك ما اهبلك ابو للكزب بس انا ...
:: فنجان قهوة وحبة قطايف وحدة عشان ما تنصح وتحكي انتي السبب ::

bos6aaaaaaaar:
منشان الله اهري قبل ما تشوفو الحزينة عندك على الرف ولا تروحلها فيه على الجاهة ... بجيرة الله يا خوي يا بوسطار خليها مبسوطة .. لا البسو عادي انا بسمحلك والبلوجرجية بيسمحولك .. بس لما تيجي عندي على البلوج حطو على الباب لا تفوت فيه .. انا من فترة لفترة عم بعمل تعزيلة قرب العيد يا عمي .. اي لكان؟؟؟؟
اما العناد .. هادا لا تسأل عنو .. انا كمان كنت عنيدة متلي متل التيس بس كبرت وعقلت .. بصدقك بهاي ..
:: فيزة دخول على مدونتي بالبسطار العايف حالو ::

Bos6ar Gadeem said...

شكرا على الفيزا

أي انا كنت أوت فيه على مكتبة الجامعة
و على غرفة الضيوف كمان

بس ما راح البسوا بالجاهه .. بدي أخليه لليلة الحنا

sweetlikearsoe said...

بسطاااااااااااار جننتني انت وبسطارك .. ليلة الحنا؟؟؟؟؟؟ لا هاي ولا هاي .. يعني لازم تكون لابس بدلة وشي بيلمع هالله هالله .. مو بسطار مش عارف من اي مزبلة .. لا من كل مزبلة المصيبة .. الله يهديك .. اعذرني بس اخريتنا نسرقو ..
وبعدين عادي تفوت بمكتبة الجامعة شو فيها؟؟؟؟؟ انا بسمحلك .. ماحيحكو معك كلمة وازا حكو احكيلهم انو انا سمحت على طول "بكحشوني" انا وانت برااااااااا