Wednesday, July 2, 2008

مجموعة عبر مستفادة :)




بما اني قاعدة بالبيت لا شغلة ولا عملة الحمد لله والشكر .. ولاني انا من النوع الي ما بيحب يقعد هيك فاضي من دون ما يعمل شي ... مبارح ماما استنجدت فيني خلينا نلف ورق عنب :: دوااااااااالي :: وانا مش انو بحب هادا الشي بس بدي اتعلم صار عمري 13 سنة وانا لسا ما بعرف كيف ورق الدوالي بنلف ..:: تركزوش كتير على العمر :: وبلشتلكم ياسلام بأول ورقة .. تقولو كرة!!! ولا برميل !! واتاريه اللف صعب ببدايتو .. وبدأت اعصب مش راضية ولا وحدة تزبط .. بعدين حكيت هي مطولة الشغلة؟؟ وهاااااااااا صرت الف من غير ما افكر .. والله انهم زبطو .. وطلعو جميلات بنافسو لف ماما كمان .. بس الاولات عار على الانوثة كلها انو حدا يعرف انو بنت الي لفتهم مو ولد صغير :)
وبس جهزت الطبخة اكلت صحن وقعدت على مدونتي الحبيبة وما قمت الا هي الطبخة سلامتكم .. خلصت


وصلنا للعبرة المستفادة من هاي القصة :" بالاصرار والعزيمة يحقق الانسان اهدافه " من اقوال الكابتن رابح الله يرحمو ويعفو عنو ..



...................................................................................................



اليوم وانا رايحة على الجامعة اجيب شهاداتي .. جبت شهاداتي :: :) :: طبعا مو بهاي السرعة بس يعني انو اتوقعو وماشاء الله عنهم المهم وانا مروحة :: صرنا بالرواح :: المهم ركبت بالغلط مع باص شكلو والله العليم البنزين عندو داعس ... وطار الباص متل الصحن الطائر .. وحسيت حالي بمدينة الملاهي .. ولا احكيلكم؟؟ بالبلاي ستيشن ولا شغلة متل هيك .. الباص كان رايح جاي يمين شمال ويعدي عن هاد وينط الا هو هون وشوي بتلاقيه باليمين وبثواني بنحرف الى الشمال بتحسو حالكم راكبين بباص سكران .. بالنهاية كان حيعمل حادث ..



العبرة المستفادة من هاي القصة : الباصات بعمان بتسرع :(



....................................................................................................



اليوم لما رحت اجيب الشهادة :: رجعنا لموضوع الشهادة :: طلب مني عمو المسجل اعطيه هويتي .. سألتو هوية الجامعة ولا الهوية المدنية ؟؟ حكالي لا ياعمو هوية الجامعة ... فكرتو مقلب انا لانو انا حكيت انها مو معي ودفعت غرامة وكمان ارجع اعطيهم اياها بإيدي؟؟ طلعتلو الهوية المدنية وما حكى شي وراح جابلي شهاداتي وحكالي روحي وقعيهم بالطابق التاني .. وفعلا متل الخيل الاصيل :: ما حدا يسألني شو هالتعبير هادا مجاز السرعة :: طلعت ووقعت الشهادات .. وب5 دقايق كان كل شي خالص .. وحكولي الله معك يا عمو .. طلعت من المبنى واطلعت شوي .. حكيت بعقلي لا يابنت مو معقول ارجعي وشوفي لا يكون في شي ناقص .. حملت حالي ورجعت ...سألتو للزلمة في شي ناقص ؟؟ضل شي اعملو؟؟ حكالي لا الله يسهل عليكي والف مبروك التخرج وزي بحكي انقعلي ورانا شغل ..

انصدمت من السرعة الي انجز فيها طلبي .. ولا اشي .. ما كان في اي نوع من انواع التعقيدات ما صدقت حالي وفكرت حالي انا الهبلة .. وهو بالنهاية طلعت انا الهبلة بكل الاحوال .. بعد التعب الي تعبتو بالجامعة اخد الشهادة ب5 دقايق والله يمكن اقل ؟؟؟



العبرة المستفادة : " الاعمال بخواتيمها"

23 comments:

Qwaider قويدر said...

اللي ما بتعلم من امه لف ورق العنب ... بتعلمو الغربة

برافو عليكي، مبروك النجاح

مياسي said...

له له له؟؟ ما بتعرفي تلفي دوالي؟؟ أحسن لك

أنا بالرغم من اني بلف دوالي كتير منيح لكن لما يحكولي تعالي نلف بتعقد؛ بحسب حساب ظهري اللي رح يروح فيها

ذكرتيني و انتي تحكي عن الباصات بكارتون سمعه لما كان سواق الباص ع سحاب؛ هاد اللي بيضل يحكي فيه بريزه بتعرفيه؟؟

اما اخر وحده أحلى شي؛ فعلا الواحد مرات من كتر الزفتنه اللي بتمر عليه في المعاملات بيستغرب لما أموره تمشي بسرعه

جبتي الشهاده؟؟ ألف مبروك:)

Mona said...

ما شاء الله عليكِ على لف الورق وانا أكبر منك بكتير وما بعرف لف ورق العنب:(
عبر حلوين كتييييييير ومبروك الشهادة:)

Qabbani said...

بالنسبة للعمر اختي بتلف روق دوالي ب 13 :)

بصات الجامعة الإردنية صواريخ ارضية


الشهادة :) يلا الف مبروك مرة تانية و هي العاطلين عن العمل زادو واحد

نهارك سعيد

Abed. Hamdan said...

hahaha
post 7elo o mosalli..mabrook el shehade o tensenash bi wara2 el 3inab :@

sweetlikearose said...

qwaider:
والله مزبوط كلامك الظاهر مجرب :)
وشكرا الك ولمرورك والله يبارك فيك :)


mayasee:
له له صرت اعرف وزمان كنت ما اعرف .. بتعرفي العربي وصار وكان واخواتها :)
ولف ورق العنب الصراحة يعني الصراحة متعب وحلاوتو جمعة نساوين والكل بيحكي عن الكل الله بينزل بإيدهم البركة من كتر ما بيحكو وبينفعلو بالنم والغيبة بقومو بنسو التعب وما بيلاقو الا الورق خلص :)
وتاع سمعة تحشيش بضل اقلد فيه ترا عندي هوايات التقليد والله :) وبعدين عندي اياه على الموبايل .. مين ما بعرفو واكتر شي بضحك عليه لما يحكي انا لما اسوق ابوي ما بعرفو :)
واخر وحدة هي اكتر وحدة حسيت حالي هبلة فيها .. والله الواحد مستحيل يستوعب انو الامور تمشي بهالعالم المعقد سهلة من اول مرة :)
والله يبارك فيكي ..
:: حبة ملبسة ::

mona:
له على سلامتك انت ما شاء الله عليكي .. " كل منو بيبرع بشي معين ولذلك كلنا بارعون" من اقوال ستي الله يخليلنا اياها .. انا اليوم ابصر مالي على الاقوال :)
والله يبارك فيكي وحلو انك انبسطتي من العبر الي اكتشفتها بعد مرور الزمن :)


qabbani:
هلا السوريات معروفات بالأكل الطيب من صغرهم وبعدين ستات بيوت .. ما شاء الله عليها اختك الله يخليكم لبعض
وبالنسبة للباصات يا زلمة شو صواريخ ارضية وفيها الها ترانزيت كمان احكيلك وين؟؟ على الراي والدستور والزراعة وهاي الحركات .. صرت اتشهد على روحي والله كنت بدي انزل بأقرب مكان بس حكيت يا بنت كبري عقلك :)
والله يبارك فيك عشان الشهادة .. وبعدين انا مو من العاطلين عن العمل عندي وظيفة :)


abed:
glad u like it man ... w allah ybarek feek w ma nseetak 3azamet 3lek mbare7 kolak 7abe mn ele mawjodeen be2awal elpost :P

Qwaider قويدر said...

بس مجرب؟ لك انا ملك الدوالي و الكوسا.. شو ما سمعتي عن طبيخي من قبل؟

Summer said...

الف مبروك الشهاده و التخرج من الجامعه...تمنياتي لك بالتوفيق الدائم.
كمان مبروك تعلّمك للف ورق العنب...هو صعب كتير حتى انا ما بحب الفّه بس بحب آكله!

sweetlikearose said...

qwaider:
بتطبخ دوالي وكوساااااااااا؟؟
والله برافو عليك الي بتعرف تطبخهم .. يعني انا بشوف الشباب بيعرفو ياكلو نادر ما واحد بيعرف يطبخ ..:)
وما سمعت عن طبخك صراحة لانو انا متل ما بتعرف يوم بكتب وسنتين لأ .. خلص بنسمع ولا يهمك :)
:: صحن دوالي وكوسا :) ::

summer:
heyyyyyyyyyy ya 6aba5etna .. :)
janbeeke wala she sa7en eldawale ele 3melto .. w ba3deen hai shahade kbere enek 7ata ente ma bet7ebe tlefe dwale m3nat-ha elmodoo3 jad sa3eb :)
:: sa7en dawale sa5en w zake :P ::

vagueraz said...

alf mabroook el ta5aroj w el shahadeh :)
bas jad d7eket 3la a5er tenteeen
العبرة المستفادة من هاي القصة : الباصات بعمان بتسرع :( ....
hhaha,, enti lazem tetshahade 3la ro7ek 2bl ma terkabi bus :) lol

حازم سويلم said...

شئ جميل طبعا ويمكن لذيذ كمان انك تتعلمى لف المحشى أو الدوالى من ماما .. ده تراث تتوارثه الأجيال .. شكلك يبقى ايه امام اولادك فى المستقبل لو مبتعرفى تلفى دوالى

تحياتى المحشية

Anonymous said...

hhhhhhhhhhhhhh, walek d7eket, thnx, o mabrouk elshahadeh 3al 7e6 elli r7 tet3allaq 3aleh
paper midicine for me
wara2 dawa lee
kouni be5air
dark-methel ma bedek-

sweetlikearose said...

roro razan:
allah ybarek feke .. w 3o2bal awladek :P
glad u liked them .. ama ana fa etshahadet 3la ro7e la t5afe ... kont mfat7a 3yone 5ayfe armosh la ye3mal 7adeth w akoon mo shayfe :P
:: 7abet choco elek ::

7azem:
ان شاء الله اولادي بالمستقبل يطلعو ما بيحبو الدوالي عشان ما اضلش الف .. شكلي يبقى ايه وانا 31 يوم بالشهر بلفلهم دوالي وهم مو شبعانين؟؟ ان شاء الله ما تطلع بطونهم كبيرة :)
شكرا لمرورك واهلا وسهلا فيك
:: حبة شوكو وفنجان قهوة ::


darkrain:
glad enak d7eket enta ... :P
w la da7aktene 3la eldwale hehehehehehehehe mn ween betjeble hal7ake hehehehehe :P
w benesbe la esnak .. JANANTNE rasme .. ya zalme ethbat .. beshahadet elmelad sho esmak ??
:: wa7ad betsa2al :P ::

hisham said...

alf mabrook la 2etelam el shahadeh, w ba3deen basat amman zay el tawabeet el 6a2erah, a shu beddi kaman 27ki...
tekno w bs wel ba2i 5ass hehe :p

sweetlikearose said...

hisham:
5areje eltechno nerdat .. enta menhom???
shof ana ma 7anaqesh beljam3at ama 2eset eltwabeet el6a2era fa LOOOOOOOOOOOOL da7aktne .. hehehehe jad ta3beer 7elo ..
:: shofeer bus ynaqshak ::

Amjad Wadiِ said...

وين صحن ورق الدوالي ؟؟ ... بس ورق دوالي مس كباب دوالي - اللي لفيتيهم بطلعوا كباب -

بتخلوا الهوية مشان تظلوا ترجعوا عالجامعة ؟ بكرة بتصيري تمري من جنبها تطلعي على طبربور - الحهة الثانية يعني -
احنا على دورنا كان اللي بضيع الهوية اعدام رميا بالبهادل حتى التخرج

bahloul said...

bejooz ma tsad2y bs benet benet 3amy btlf dawaly w hey 3mrha 10 sneen, amma el basat ya setty f hey ma btemshy 3la banzeen btmshy 3la deezel :p , w 3ady law 7akeeteely enek bedek tet3'alaby bel shehadeh kan waseet 3leeky bel tasjeel y25roolek eaha shway, l2nny wasel honak :p :)

hisham said...

7aram... shu 6ollab techno nerdat.. bs hard workers eza 9a77 el ta3beer

Maher said...

loool! jad enek ta7sheesh!
i always love reading your posts! lol

alfff mabroook BEE!!

sweetlikearose said...

amjad:
يا مين يسمعك اروح على طبربور يارب.. احكي امين يارب :)
والك صينية دوالي بحالها .. ولا يهمك .,.
وبالنسبة للهوية .. انا ما حبيت الجامعة بوجودي فيها يا مين ترى برجع ازورها؟؟ سؤال المليون هادا ..
:: بوكسة دوالي لفها وطعمينا وورينا شطارتك لنشوف :( ::

bahloul:
hala2 5alena net7asab w ba3deen bne7ke belmawadee3 eltanye .. 3endak was6a w msharshe7ne beljam3a?? ::wa7ad be9are5 e bel6om :P ::
w belnesbe laldawale tra ana ektashafet eno mo sa3be .. jareb :P
ama elbasat fa masheha ya zalme la edoG :P
:: sa7en dawale zake ::

sweetlikearose said...

hisham:
looooooooooool nerdat w no9 w tlat arba3 kaman :P
:: naddara mdawara hadeye elak ::

Maher:
Glad u like them man .. ana kaman I love reading ur post .. :)
allah ybarek feek w 3o2balak yarab ... shedelna 7elak :)
:: bokset dawale w warena sha6artak ::

Anonymous said...

مرحبا كيفكم شو اخباركم وكيف اخباكم انا قرات اغلب المواضيع اللي انتي كاتبيتها وبدي اسال سؤال واحد اكيد انه كل هاي المواضيع كتبتيها لانك بتحسي فيها ولانك عشتيها وعايشتيها لكن الغريب بالموضوع انك لحد الان ما كتبتي عن موضوع الحب او شو بتتمني عموما انا ما الي دخل باللي انتي بتحكيه ولا هاد اله موضوع باللي لازم اعلقه اللي حابب اوصلك اياه مهما كان الانسان حريص انه يوصل افكاره للغير صعب الغير يفهم شو اللي لازم يوصله مهاما كان لبيب يعني انا عندي العبره المستفاده من لف الدوالي كان كالاتي انه البنت اللي ما بتعرف تلف دوالي بتلف فيها الدنيا

sweetlikearose said...

اهلا وسهلا فيك في مدونتي ..وشكرا لمرورك
الفكرة من الكتابة مو توصيل الافكار ما اتوقع انو في حدا هون بستنى حدا يتوصلو افكارو .. الفكرة هون هي الكتابة بهدف المتعة مو اكتر .... بهدف نلاقي ناس تقرأ الي احنا بنكتبو ... يعني تواصل مو اكتر ... وانت سيد العارفين ...
وبالنسبة لموضوع الحب انا في عندي موضوع جاهز وبالدرافت بدي انزلو كمان ساعة تقريبا ...
وبالنسبة للف الدوالي .. فما فهمت عبرتك ابدا .. اشرحها بليز...
:: بكيت شكلاتة زاكية لا تاكلو لحالك طعمي الي حواليك بلاش تنصح :)::