لا اعلم لماذا قررت الرجوع للكتابة بمدونتي الخاصة بعد انقطاع دام 5 سنوات توجهت فيها لبرنامج التواصل الاجتماعي الاخر وهو الفيس بوك ... كنت مفتونة به لكني علمت من خلال تجربتي الخاصة ان قراء المدونات وكتابها ارقى فكرا واسمى هدفا وافضل بكل شيء .... يكفي ان كثيرا من الناس الان لا تقرأ .. بل تفضل وضع لايك "" عالماشي "" او تقوم بمجاملات كاذبة ... اصبحت حياتنا مكشوفة جدا لا شيء خاص ... وساخصص لهذا الموضوع زاوية في مدونتي ... اريد العودة لايام مضت ... خرجت من هذه المدونة باصدقاء رائعين دامت علاقتي معهم سنين واخرين ما زالت الى الان ... يكفيني ان احاول اكتشاف عالم التدوين من جديد ... فكل شيء بالنسبة لي تغير ومن كانوا يكتبون لم يعودوا موجودين ولا صفحاتهم حتى ... اريد اكتساب اصدقاء يكتبون ويقرأون كل شيء لانهم يحبون ذلك ... اريد الابتعاد عن عالم الفيس بوك قليلا ... الى عالم لا يعرفني فيه احد معرفة شخصية فيجاملني تارة ويتدخل في حياتي تارة ويراقبني تارة اخرى ويفسر ما اكتب على انه له ...  ساحاول اكتشاف المدونات الحية قدر الامكان  ..... فبسم الله ابدأ

العطلة الصيفية جاي :)

احنا هلا بنشهد مرحلة هدوء ما قبل العاصفة ...

هاي الفترة فترة الامتحانات النهائية .. طلاب الجامعات والمدارس بيمتحنو ومشغولين بالدراسة ..

والمعلمين والدكاترة مشغولين بكتابة الامتحانات والتصليح ..

كلو مشغول ..

الوضع بالنت هادي ..

اول ما تيجي العطلة الصيفية كلو بيفيع ... بتصير السهرة صباحي :)

يالله ازهئت من الدراسة والمدرسة والامتحانات ... :(

بنا نخلللللللللللللللللللللللللللللص

ملفات اخرى

العمل بالمدارس الخاصة يعني مهمة مهلكة تماما ... قبل ما اصير انا معلمة بالمدرسة المشؤومة اختي اشتغلت معلمة اول ما تخرجت بالكلية العلمية الاسلامية ... وان كيس ( محاولة للتحضر معناتها الهندي في حال ) ما حدا بعرف قرف التعامل مع المدارس الخاصة .. فممكن تكون هاي المدرسة اكتر مدرسة التعامل معها مؤذي من الناحيتين النفسية والجسدية .. وطبعا اختي ما تحملت تركتهم من الفصل التاني ودفعت البند الجزائي الي كان عليها واشتغلت بالبنك ... كان وئتها المدير العام للمدارس الدويك ... بعد فترة اقالوه لانو اتوقع كان مريض نفسيا بطلع كل مرضو على الطاقم التعليمي والاداري .. بيحكو صارت المدرسة ارحم شوي من اول مع استلام الادارة العام شخص تاني ... هلا المدارس الاردنية الدولية الي انا بشتغل فيها صارت افظع من الكلية العلمية الاسلامية بسبب انشغال المديرة :: زوجة الدويك :: بمئاهرة المعلمات وعمل بعض التصرفات المزعجة متل اختراق كل القوانين البشرية والعمالية وكل شي بدكم تعرفو .. يعني نئلت وباء مرض الدويك من الكلية العلمية للمدارس الاردنية ... ما عاد في بني ادم بدو يضل عندهم .. طاقم الاساسي ما ضل منو غير 4 معلمات من اصل 25 اشي هو طفش واشي هم فنشوه..

سياسة المدرسة بعد المديرة الجديدة ما استلمتها ...:

اولا المديرة هاي ما عندها اولاد ... وعلمكم لما مرة متسلطة فاضية اشغال واعمال تستلم ادارة مدارس ضخمة .. اول شي بتعملو بتبدأ تتفلسف على المعلمات .. وبتبدأ اطلع كل الامراض النفسية وعاهاتك يا وطن بالمعلمات .. وخصوصا معلمات الاساسي ...

فرق كبير بين التعامل مع معلمات الاساسي والثانوي ... وهي بعض الفروق وقارنو :

1) الاساسي بشغل بكل طوابق المدرسة اما الثاوني ما بشغل الا بطابقو .. وعلى هادا الحكي احنا ازا بكون عنا 6 حصص يوميا من اصل 8 حصص بنشغل السابعة ..ومو بس هيك ... بنشغل عند النبات الكبار .. وشوفو المسخرة

2) الاساسي ممنوع يشوفوكي ئاعدة لانو يعني انتي هيك ما بتحللي الفلس الي بتاخديها .. طيب نصاباتنا كتيرة وشغلنا متعب خلونا نئعدلنا حصة .. بمرضو .. طبعا الثانوي ما حد بيحكي معهم وين رايحين ..ولا ننسى انو شغل الاساسي ما بعرف من وين بيجي .. والله بطلعو الشغل من تحت الارض .. وبعقدو الامور لما بدهم يعقدوها ... بتصير الوحدة بدها تغتال المسؤولة عنها ..

صحيح نسيت احكي انو من الاسباب الي حتنهار المدرسة بسببها وانا متأكدة والكل نازل اسافين بالتاني .. هو انو في اكتر من راس كبير بدو يثبت حالو... مثلا انا مسؤول عني 6 ادارات .. المديرة العامة للمدارس الدويك .. والمشرفة العامة للمدارس ... وبنت صاحب المدرسة ... ومديرة قسم الاساسي المديرة المباشرة ... ومشرفتين لغة انجليزية ...وكل حد عندو رأيي وبيزعل ازا ما طبئتيه ومين بروح فيها؟؟ احنا المعلمات ...

3) لما يجو يختار المعلمات .. الثانوي بختاروهم على الخبرة ... الاساسي بيختاروهم على الحلاوة .. وللاسباب التالية :

أ) لازم لما يجي الاب يتعامل مع الملعمة يشعر بجمالها الخلاب .. ويبطل يركز شو بدو يحكي او يبطل بدو يشرشح ..

ب) لازم المعلمة الحلوة تكون لزيزة مع الاطفال .. اما ازا كانت بشعة بخافو منها الاطفال ... وببطلو يحبو حصتها .. وتعالو وشوفو طاقم المعلمات عنا بالمدارس اتحداكم ما تحكو نفس هالحكي .

ج) المدارس كتيرة برامجها الترفيهية ( بتسوق لنفسها عن طريق المهرجانات والالعاب وبتنسى التعليم نفسو ) وبما انو برامج المدرسة كتيرة فبكونو معلماتها الحلوات باستقبال الاهالي بمتل حفلة عيد الام و اليوم المفتوح وهاي الحركات الفاضية ..

بتزكر وئت عيد الام ... ئعدنا نشتغل شغل مو شغلنا ... نعمل كروت للأمهات قال ونعمللهم هداية وشموع مع طالبات صفنا .. وطبعا راحت حصصنا لمدة اسبوعين بين الاعمال الفنية وتدريبات البنات على الفقرات ... تحولت حصص الانجليزي لحصص فن ودراما الحمد لله والشكر ...

واسباب اخرى طبعا ..

غير انو لازم احنا معلمات الاساسي نشتغل شغل مضاعف ..

انا شخصيا دخلت نظام جديد اسمو ورق العمل المكثف : من هبلي طبعا :: وكان بعتمد على اكتر من ورقة عمل واحدة للوحدة ... بالاضافة لتلخيص الوحدة كاملة ... مع رسومات واشياء .. وكل شي مطبوع على الكمبيوتر .. بس للأسف صارت معي مشكلة ببداية الفصل الثاني .. وسببها نئل حكي كزب من احدى طالبات خامس لاهلها .. وهون بننتقل للنقطة الاهم ... انو المعلمات غير محميات بالمدرسة بسبب سياسة الدويك ... الاهل دائما على حق .. واكتر من مرة مشرفة الاساسي بتحكيلي انو اعتبري نفسك بمطعم والزبون دائما على حق ... عادتها اكتر من مرة رحت عصبت وحكيتلها .. احنا هون مو بمطعم ومو جايين نرفه الاولاد والطلاب .. احنا هون بمهمة تعليمية .. وبحال انك نسيتي يا مس .. احنا هون بنتبع لوزارة التربية والتعليم ومو لوزارة السياحة ... ( كنت حاخد انذار :) ::

وبالاخير بحكي .. انو الشغل بهيك مدرسة ئرف ... وازا كانت كل المدارس مئرفة متل هيك فالله يغنينا .. لانو بالنهاية شو الراتب الي بناخدو على التعب الي بنتعبو ؟؟؟ ولا بنروح شغلنا معنا ... والله احيانا كنت انسى اكل من اد ما مرئت علي فترة صعبة ومو فاضية فيها ابدا.... غير انو ما في امان وظيفي ... ابل يومين فنشو 7 معلمات كانو مجددين معهم عقود للسنة الجاي .. طبعا لا اخلاق ولا ذمة ولا ضمير ... ومعظهم معلمات مسكينات .. متى فنشوهم؟؟ لما اطمنو المعلمات انهم خلص حيشتغلو هون وما راحو دورو على شغل تاني ... طيب هاي مو نذالة؟؟ على اخر السنة بعد ما صارت المدارس موقعة عقود مع المعلمات الي بدهم اياهم؟؟

بس الظلم بهاي المدرسة على كف مين يشيل ... وانا وقعت لا ارغب من البداية لاني سعيدة اني تخلصت من هيك ناس :)

والله الو حكمة لما خلى رزئة العبد بإيدو ومو بإيدين الناس

هيك شكل اوراق العمل الي بعملها:

invisible (part 1)

What would u do if u were invisible?

كبرت افكاري

مو عارفة يا جماعة من وين ابدأ ... طبعا هدول شهور وشهور الي غبتهم ورجعت ولئيت كل شي مختلف ... كتير ناس راحو ما عاد بنلائيهم وكتير ناس من الي بحبهم وبعزهم ما زالو والحمد لله بالمدونات ... ناس كتير سكرت مدوناتها وحذفتها مع انها كانت رائعة .. وناس كتير فتحت المدونات لناس معينة وانا كنت افوت على المدونة مرة كل ستة اشهر :: مش عارفة ازا الي ست اشهر غايبة ولا اكتر::

بس بالنهاية سعيدة اني رجعت وححاول قدر الامكان اكتب واعطي الي عندي .. لاني واخيرا بحب اني ارجع للمساحة الي كنت اكتب فيها النهفات الي كانت تصير معي .. وما تتخيلو كم بضحك لما اقرأ الاشياء الي كاتبتها ايام الجامعة .. واااااااااااااااااااو كأنها الها عمر ..

من لما تخرجت من الجامعة الي بالتأكيد كنت اغلبكم بعرف اني ما كنت احبها .. من وئتها وانا مبسوطة اني تخرجت .. ما بعرف صراحة ما بحس حالي ندمانة اني تخرجت .. يمكن بشتائ للجامعة 10% كل شهرين مرة .. :: لاحظو اناما بحكي بالاشهر صرت اخوف :: بس صراحة عالم الشغل عالم غريب غريب غريب ما فيني احكيلكم كيف انا شفتو ...

اشتغلت معلمة .. طبعا لهدف ببالي فكرت انو سهل اني اوصلو .. اكتشفت انو مو سهل واني يمكن اضطر اشتغل معلمة سنتين تانيات لحتى ائدر اوصل لهدفي ... مترجمة ... مترجمة محترفة .. لانها بدها دورات وخبرات وتدريب ..

درست في مدرسة خاصة .. ما ححكي اسمها هلا ... وما ححكي شي عن الظروف الي عشتها ... بس انا اكتشفت من خلال التدريس بهاي المدرسة انو الشغل مو متل ما انا كنت متوقعتو .. اصطدمت بالواقع واخيرا ... حلو اه .. بس التعامل مع اصحاب الشغل شي سيئ ... خصوصا ازا ما كانو بخافو الله .. بس الحمد لله طلعت من التجربة مبسوطة بإني فدت واستفدت .. وتعرفت على مجموعة طيبة من البنات الي جد حبيتهم ... من معلمات او طالبات ... ما فيني احكيلكم جو المعلمات شو جو ------ :: مشفرة :: لكن جد تعيس .. ومع ذلك ممنونة للخبرة الي اخدتها بالتعامل مع الناس وممنونة انو اتيحت الي فرصة اكون معلمة ...
ورح يطلع كتاب حسميه " المعلمين في ضرب الاسافين " قريبا ترقبو :)

درست ولاد وبنات .. وبالتأكيد ححكي ببوست تاني على رواء عنهم .. لكن خلي هاد البوست افتتاحية ... وان شاء الله ائدر اضل مستمرة هون ...

بالاخير بحكي لكل الي حكولي الشغل عالم اخر : انا هلا صرت بآمن بهاد الشي ... ومقتنعة

ياريتني ارجع طفلة .. بنت مدرسة بتلبس زي المدرسة وبتحمل الشنتة ام 10 كيلو :)