ما عندي حكي اكتب عنو حاليا ... غير اني دايما عندي صداع ودايما جوعانة ودايما تعبانة ومعجوئة كمان

بس نفسيتي الحمد لله احسن من الي كنت متوقعتو على بداية الجامعات .. لأنو انا بضل اضحك لتبدأ الجامعة بدايق

هلا لا الحمد لله مرتاحة :: ذهبت اسباب تعب النفسية بإذن الله:: الله لا يعيدها من ايام وانا متأكدة انو هم حيندمو لأني فعلا ما عملتلهم شي

وسيبكم من الموضوع وانسو .. شو ضل كمان حكي؟؟ مشكلتي من التعب مو قادرة احكي ولا قادرة اكتب .. ان شاء الله اول ما اتحسن شوي بنزل بوست ..

سؤال(ن) صعب(ن) سؤال(ن) يحيرني

اوكي انا بس بدي اسأل عن بعض الكلمات الي محيرتني .. لأنو كل ما احكيها قدام حدا بيعلق .. موخلصانين ..

هلا بنحكي :

بسترجي ولا بستجري

زوج ولا جوز

بني بكسر الباء ولا بني بضم الباء؟

صينية ولا اصنية ولا صنية؟

مزحة بكسر الميم ولا مزحة بفتح الميم؟

مبارح ولا مبيرح ؟؟

اقفل الباب والضو ولا طفي الضو وسكر الباب ولا سد الباب واغلق الضو؟؟؟

قدها؟؟

عندكم استعداد تلبسو بنطلون احمر بلون هالوردة لو نزلت الموضا؟؟ شباب وبنات طبعا ...

الاكل ... رمضان .. وانا

هادا حضرة سعادتي الكريمة بحب الطبخ من يوم يومي .. وبحب لما اطبخ اطبخ لحالي .. بس بحب الناس تقعد تحكي معي .. اول اربع ايام من رمضان انا الي طبخت .. وبعمل فتوش مستحيل يوم يمر من دون الفتوش .. الحمد لله على النعمة ... المهم .. بعمل الطبيخ لحالي .. اول يوم بدأت الساعة 4 خلصت الساعة 7 وقت الآذان بالزبط يعني لما خلص الآذان السفرة كانت محطوطة ..

..تاني يوم تأخر الاكل لنزل عن السفرة 10 دقايق

تالت يوم اتأخر نص ساعة .. لانو حضرتي قررت على الساعة 4 اني بدي اعمل معجنات .. وشو طلعت من الاخر بتعجبكم .. هي بتشبه كل شي الا المعجنات .. مع اني انا مو اول مرة بعملها وانا بزبط الطبخة الي بطبخها بس قال عشان السرعة عملت اشكال عجيبة ما صارت... بالنهاية الكل اكل وضل لتاني يوم وتاني يوم سخناهم واكلنا ... هلا مبارح كمان اتأخرنا بس هالمرة 10 دقايق .. بس احلى شي اليوم اختي الكبيرة استلمت السفرة ... وما تأخرنا ولا دقيقة .. طيب انا دمي حامي كتير .. بشتغل متل الطيارة بس دايما اتأخر برمضان على الاكل .. واختي دمها بارد .. بطيئة قد ما الله اعطاها بطئ .. بس بتنزل الاكل انو على الوقت

المهم ... اليوم حطو على السفرة مخلل فليفلة ... يا حبيبي انا مديت ايدي وحطيت في الخبزة كمية بتعجبكم عشان انا بحبو .. واز بهي ليس فليفلة واز به فلفل ... وانا كره حياتي حد يحكيلي شي على فلفل او طعمة فلفل او بحرق او شي ... ولهلا لساني وشفتي واصابعي بيحرقوني ...

واختي المصونة قرأت نوع من السلطة وحبت تعمللنا اياه .. حدا بحط مع السلطة يالله بيض مسلوق وبطاطا مسلوقة وميونيز وتوناااااااااااااا؟؟؟؟ يالله كيف يعني؟؟؟ ولا الهبلة راحت عملت فتوش كمية كبيرة وحطت كل هاي المكونات الاضافية وانا مجرد ما حطيتها بتمي بس هيك ما حبيت اكسفها والا اعوذ بالله ... مو زاكية ابدا ابدا .. مابدي اشرح شو صار فيني ... وطبعا الكمية ضلت متل ما هي

انا برمضان عادة بنحف ما بعرف هاي السنة ما عم باكل كتير وبنصح :: ما بدي ما بدي :: بحب الاكل ...

اما الفلفل مو مزحة :(

راس مالها عليه ...

انا من النوع الي ما بحب ينزل على السوق كتير .. صراحة زمان ما كنت ارضى انزل ماما كانت تجيبلي على زوئها .. والمصيبة قال احيانا ما يعجبني .. هلأ هاي الايام بحب انزل على السوق .. لاني بحب اشتري اشياء جديدة وحلوة ..

قبل كم يوم نزلت على السوق ... وطبعا دخلت على هالمحلات وطلعت على هاللبس .. طبعا انا هاي السنة حاسة في تشكيلة منيحة من اللبس غير عن كل سنة .. زمان كان اللبس موحد ... بتدخلي على المحل كأنك داخلة على الي قبلو والي بعدو .. لا هلأ خفت الحالة وصار في كتير تنوع وهيك احسن .. المهم .. عجبتني بلوزة كتير كتير حلوة .. قستها .. طبعا البياعين بدهم يبيعو وانا ما بدي الا البلوزة
... اجى الزلمة بحكيلي شو بدك معها؟ حكيتلو ما بدي اي شي خلص بس هي ..

- طيب يختي ما بدك معها بنطلون جينز؟

- لا والله انا عندي بنطلون جينز

- لا ما هي اللبسة حلو كلها تكون جديدة عشان تبهج

- ما انا اشتريت البنطلون قبل كم يوم

- لا بس يمكن لونو ما بيلبء على هادا اللون يعني مو جاي من الدرجة

-انا :: اهلين عمي ماشاء الله عند اللزوم بصير منسق ورود :: لا بلبء هادا جينز

- طيب ما بدك شي تاني؟؟ شوفي هاي القطعة وصلتنا اليوم تشكيلة واسعة والوانها بتاخد العقل وبعدين لابئة على بشرتك هيك عليك بتطلع كتير حلوة ..

- انا اطلعت فيه وبحكي بعقلي :: اكسكيوزموا :: لا ؟؟

- لا بس كم بتحسبلي هاي القطعة ؟؟

طبعا انا ما بعرف افاصل ولا بحب المفاصلة .. بس انا ما بدي البلوزة طبعا تكون غالية ..

حكالي هاي البلوزة ب 15 والك ب 12 عشان نكسبك زبونة .. ولا احكيلك !! .. خديها ببلاش .. :: نفسي اخدها ببلاش عشان اشوف ردت فعلو يمكن يسخن وياخدو على المستش حرارة :: فأنا ما حاولت اناقشو ...

لحالو فجأة حكالي : يختي اقل من 12 انا خسران .. راس مالها علي 10 ... حكيتلو اوكي .. حطيتها على الطاولة ورحت اشوف قطعة تانية لفتت انتباهي .. اجى حكالي خدي قطعة تانية بحسبلك اياها ب 8 .. :: واااااااات؟؟ ولا اشي من 15 نزل ل 12 وبعدين نزل ل 8 شو قصتو هادا؟؟ :: .. قلتلو والله ازا عجبتني قطعة :: استنو استنو بستهبل علي بدو يطلع حقها بالقطعة التانية مفكرني هبلة بس يالله كيف بضحكو على العالم :: فاتت هالزبونة عندو ووقفت على الطاولة وانا كنت عم بقيس جوا بلوزة تانية ... وصاحبيتي واقفة بتستناني .. طبعا الزبونة عجبتها البلوزة الي انا بدي اشتريها .. وسألتو هاي لحدا .. حكالها لاء بدك تقيسها فوتي ... طبعا فاتت وقاست وانا صرت طالعة وبدي خلص اخد البلوزة واضل طالعة .... وين البلوزة؟؟

اي بلوزة؟

الي انا قستها قبل شوي؟؟

اه ما انت ما بدك اياها .. اعطيتها لزبونة تانية .. ووطى صوتو طبعا وهو يحكي ..

اه اعطيتها لحد تاني يقيسها .. طيب ما صار الحكي اني بدي اشتريها منك .. ؟؟

لا ما بدك اياها ما صار ..

ايوااااااا ... لسا بدي اكمل حكي طلعت البنت بتحكيلو بتاخد العقل بدي اياها ... طبعا انا ازا ضل براسي عقل تعالو واجهوني .. يعني بعد ما لفيت لفيت وهادا كان المحل القبل اخير بفوتو وخلص تعبت ولقيتها هي الي بدي اياها تيجي وحدة تقيسها وتعطيها اياها .. انا قلت هلا بستحي على وجهو يعني ما استحى قبل شوي هلا بستحي .. وابدا نزلت البنت تفاصلو فيه ... انا كان بدو يعطيني اياها ب 12 وازا بشتري شي معها بعطييني اياها ب 8 .. بس شوفو الوقاحة عينك عينك ... فاصلتو البنت واخدتها بتمنية والله بتمنية .. وحطها قدامي بالكيس واعطاها اياها وانا واقفة انا بطلع هيك مصدومة انو شوالي صار هلأ بالزبط؟؟ وبس طلعت البنت انا سكتت هيك وحملت حالي وبدي اطلع مباشرة ولا بدي احكي معاه ولا كلمة .. والا هو بيحكيلي خدي قطعتين من المحل وبحسبهم التنتين عشرة .. حكيتلو لا ما عجبني شي غير البلوزة ...

لا يختي خدي والله جد بحكي انا اسفة بس هاي زبونتنا وانا ما بقدر احكيلها لاء يعني .. شايفة البلوزة والجينز الي هي لابستهم هادا من عنا الشهر الماضي اجت اخدتهم .. :: وبلش عاد خرط :: اها

لا مو مشكلة انا اساسا خلص طلعت من نفسي من اول ما اعطيتها للبنت تقيسها صراحة مو زوء ابدا الي انت عملتو .. وبعدين انا كنت ماخدتها منك ب 12 وانت بعتها بتمنية ... راس مالها عليك 10؟؟ اه كتير 10 معناتها خسران ... بس انا عارفة بعتها وانت بتضحك لانك مو خسران ابدا ...

يختي حقك علي والله ما بعرف انك انتي بدك تزعلي كل هالقد ..

لا ما زعلت بس ما كانت زوء منك ... كلها خلقت بلوزة ...

طيب اشتري الي بدك اياه من المحل بحسبلك القطعة بخمسة

مسكت حالي وطلعت انا وصاحبيتي وحكيتلو لا عجبني المحل ولا الي في المحل .. وطلعت :)

عنجد ما بستحو وهاي مو اول مرة موقف متل هادا بيصير .. اه يمكن لأنو هديك البنت من دون هدوم .. الله يخزيهم بس ..

رمضان كريم

رمضان بكرا

بحب رمضان كتير.. يالله اجواؤو ما احلاها .. بس زمان واحنا اطافيل كانت احلى .. كنا نطلع على السطح قبل الأذان ونطول في هيك عنا سلم خشبي كبير كنا نحطو على وحدة من العمدان الي طالعة شوي ونعمل سيسو .. ونستنى الأذان .. ولما كبرنا صرنا نروح على السوق نغير جو ونرجع قبل الأذان بشوي ... غير انو السهر هادا كان حلو كتير .. مع اني كنت اسهر لحالي .. او مع صاحباتي اول ما جبت الموبايل ... كتير كانت ايام حلوة ..


هادا غير اللمة والجمعة والعزايم والاهل وكل يوم فتوش وشوربة واشي زاكي .. انا الي نفس على الاكل برمضان وبحب اتفنن بالسفرة وبحب ازينها ..


كنت زمان اروح على صلاة التراويح بس الي سنتين ما عم بروح بتلاقي الدنيا شغل والحالة حالة .. بس ان شاء الله هادا الرمضان بدي اروح ..


طبعا انا هلا بحكي وفي زكريات بتمر بخيالي .. ايام مطبوعة متل كأني عم بشوف تلفزيون ..

ما بعرف مالي مو جاي على بالي اكمل البوست .. متحمسة يمكن اروح اسهر معهم ...

حبيت احكي كل عام والجميع بخير ..

زكريات من حياتي

اللغة الانجليزية

الانجليش للي ثقافتو يابانية
انا بحب الانجليزي ومن وانا صغيرة .. بس لما كنت بالخامس :: يرحم ايام الخامس كنا ناخد اي ابيل :: مو زي ايام هلا .. المهم .. من وانا بالخامس الله بعتلي معلمة انجليزي الله يسهل عليها كانت بس همها شعرها واظافرها وتدور على مبرد ومين معاه علكة .. كانت تمسك دفتري وتشرح من الامثلة الي كنت انا احضرها .. وبالاخير اخدت بالسبعين .. انا طول عمري الحمد لله متفوقة .. بس يعني لما معدلك يكون 79 بالانجليزي والمعدل بشكل عام بطلع عن تسعين مصيبة هاي .. والكل يبهدلني والحالة حالة .. طبعا لما صرت سادس شرفت نفس المعلمة .. ونفس الشي عملت .. ونفس العلامة 79 .. واجتني بالسابع ونفس الشي ونفس العلامة .. يعني ازا كانت اهم مادة بدها تأسيس من اهم السنين .. خامس سادس سابع ما اسستني .. معناها يعني انا بدي اطلع انا ودفعتي حمير من الاخير .. كنت اشك انها بتغير دفتر العلامات .. ما بتغيرو .. هو هو من تلات سنين الله وكيلكم .. بالتامن تغيرت المعلمة والله والله صار معدلي 99 من 100 .. يالله شو كنت مبسوطة .. يعني هو عشان الحلال والحرام 198 من 200 بس يعني هادا بالنسبة الي شي اثار الفضول انو هاي الهبلة الي قبل هاي المعلمة شو كانت تعمل؟؟ بعدين بدأت اتأسس صح ومعدلي بحياتو ما نزل عن 197 بالانجليزي وانا بالمدرسة بالاساسي والثانوي كنت مجننتهم .. وتخرجت ودرسة انلجيزي .. بالتوجيهي ما احتجت اي دروس بالمرة الحمد لله .. لما صرت ادرس الانجليزي بالجامعة بدأت امور تتغير عندي ... صار الانجليزي يعدمني يومو صعب .. بس لاحظت على حالي انا صرت من هدول الفافي الي بيحكو كلمة عربي كلمة انجليزي .. بس ما وصلت فيني احكي دادي ومامي وهالحكي هادا لسا :: كدنا يا جماعة :: وبعدين قررت انو لازم اختار يا هاي يا هاي حاولت اختار الانجليزي لاني بحكي انجليزي بدراستي وبالمحاضرات الكل حكالك شوف هاي التانية شايفة حالها على شو فبدلتها بالعربي .. وصرت لما احكي انجليزي بس يكون بالمحاضرات او لما بدي احكي قدام اختي الصغيرة بتعرفش تفك الشيفرات :) حتى على مدونتي ما بحب اكتب بالانجليزي .. مو لاني ما بعرف بس لاني فعلا بحب التعبير بالعربي .. بالانجليزي بتفقد حلاوتها الكتابة ...
بحس حالي هيك ما بعرف اعبر ... بحس الموضوع لو انكتب بالعربي بيوصل المعلومة كتيراحسن من لو ازا انكتب بالانجليزي
.. وبعدين لو انت طالب انلجيزي حتزهق الانجليزي ويومو وحتصير تبعد عن كل شي انجليزي الله وكيلكم انقعوني بنقط اي بي سي ..
شكسبير،ادب انجليزي واحد واتنين وتلاتة واربعة وخمسة .. مع العلم انو لسا باقيلي اربعة وخمسة يعدمني يومهم ومالت علي حيطة مايلة فوق ما هي مايلة .. الله يخلصني ..

هادا جزء من زكرياتي بالمادة لانو انا ما كان عندي اي مشكلة او اي معاناه لما اخترت التخصص .. ما احترت ابدا .. الحمد لله على كل حال ..

استفتاء

بيان صادر عن الادارة الروزية

قررت ادارة البلوغ:: الي هي حضرتي:: عمل استفتاء جماعي بهدف تحسين وتطوير البلوغ ومواضيعو .. لمعرفة الاشياء التي يجب ان

تحسن الادارة منها :: على اساس يعني :: احم

علما بأن على الجميع المحافظة على سرية الآراء وان يكونو صريحين


يعني بالعربي الفصحى لازم تجاوبو باسم مجهول بليز ما حدا يعلق باسمو الحقيقي او باسم مدونتو وماحدا يعلق بموضوع خارجي مو من

المواضيع الي هون لاني راح احذف اي تعليق مو مناسب

التعليق بيكون على:

1) على المواضيع

2) على الاسلوب

الله يعين القطار والحمار

انتظروا

guess what?? it is mY birthday :P

2/9

اول شي مو عارفة ليه ما خلالي التاريخ فوق 2/9 مع انو هلا الساعة عندي 12:42 الصبح بس ما بعرف شو مشكلتو بس المهم:

بما اني اكتشفت انو كل البنات الي بحكي معهم مو صديقات .. وبما اني ححتفل مع اهلي واقاربي في العمارة .. حبيت اضمكم للمجموعة الي بدي احتفل معها اتمنى تنضمو ..:)

يالله خلص كل واحد على بيتو خلص الاحتفال ..

:: واحد بوزع ملبس زاكي::