منوعات

واخيرا خلصت امتحاناااااااااااااااات واخيرا بدي اعمل عرس اردني بس ناوية اخليه يوم العرس الاردني الكبير الانتخابات عشان تكون فرحتكم فرحتين ...

انا الصراحة ما بعرف شو بيصير فيني وقت الامتحانات خلص هيك بتوتر وببطل انام وبنحف وببطل احكي مع حدا وما بفضى لحالي ومع الشغل كمان بزيادة صار الاكل عندي شي ثانوي ماهو لازم شي اساسي يتحول لثانوي والنوم كمان صار ثانوي يعني لحقت اكلت هيني اكلت ما لحقت خلص راحت علي نفس الشي النوم .. وبما انو اليوم وبعد اسبوعين تعب ومرارة خلصت امتحاناتي فبدي من هون للامتحانات النهائية ما اعمل شي مفيد :: ما حتزبط :: المهم ..

الموضوع الي حكت فيه ملائط كتير حلو .. الضغوطات مو من الاشياء الي احنا بنعملها او بتنفرض علينا بس بسبب الطريقة الي احنا بنطلع فيها على الاشياء .. فممكن نفس الموقف يسبب الضغط الي بينما غيري ما يحس فيه ويكون بالنسبة الو شي كتير عادي .. ففعلن وانا هاي جربتها انو الانسان المتفائل انو الشي المنيح حيصير فعلا بيصير

..

شغلة تانية .. هلا في واحد من المرشحين حالهم بيعطي الي بصوتلو 100 دينار ... هاااااا؟؟ يعني اتخيل كم 100 دينار بدو يوزع .. طبعا انا ما بعجبني هادا الشي لانو الصراحة انو الانسان الي بيعمل هيك مو واثق من نفسو انو يعني راح يفوز بجدارة وعم بحس انو هالعالم الي عم بتفوز عم بتفوز بلعبة مو بشطارتها ..

بس

لا تخافو انتو بإيدي امينة

هلا حاسة حالي جديدة على الكتابة ما بعرف يمكن لاني الي فترة طويلة ما كتبت زي العالم وما تابعت شي ولا كان عندي وقت احط شي ببالي اكتب عنو .. بس انا أأوكد لحضراتكم الكرام انو انا خلال يومين خلص برجع متل اول بس الشغلة بدها تدريب لاني والله نسيت شي اسمو مدونة ...وحاليا مافي شي ببالي غير اني بدي اطير من الفرحة اني خلصت امتحانات الميد ...

اشتقتلكم جميعا ...

:: wa7ad shy mnkom ya jama3a ::

وهيك العالم بتعرف تبلش مرة تانية كتابة على جهاز سريع ومحترم
ماعندي حكي كتير الابس حبيت اسلم .. لانو بتعرفو فترة الامتحانات انا بنضغط كتير وما بعرف أبين .. والي بدو يخصم من الراتب يخصم بس على اليوم قرشين احسن ما اسخن .. والي بدو يستأجر المدونة ما عندي مانع .. والي بدو يبيعها يعطيني نص حقها .. والي بدو بسطار جديد يجي لعندي .. والي بدو عطر يزور صديقنا عطور والي بدو يعرف شي عن القدس لمنوش على طول ويسلملي عليها هالعسولة ... والي بدو خلص شو انا بوزع علكة هون؟؟؟؟؟؟؟؟؟؟
المهم انا ان شاء الله بخلص يوم الاحد الجاي باقيلي امتحانين وبعد هيك بزهقكم سو ادعولي ما تدعو علي

:)

الحمد لله على سلامة المدونة وصاحبية المدونة وجهاز صاحبية المدونة والجميع :: طنشو اخر ناس ::
والله يا جماعة الكم وحشة .. الصراحة انو انا جد مقصرة بالمدونة لكن لو احكيلكم انو انا من تلات اسابيع عيني ما شافت النور بكون :: كزابة :: شفت النور بس يعني مو فاضية احك شعري :: هادا دلالة على انو شعري ما في قمل نضيف::
المهم هادا كان في هجوم عنيف على كمبيوتري الحزين من الفايروسات ما بعرف خلص هادا برنامج الي بنضفلي الفيروسات :: الانتي فايروس للي ثقافتو هندية :: وطبعا صار الكمبيوتر يتصرف متل الهبيلة .. وحتى انا بشك انو في حدا بدخل على موقعي .. بس مين ماكان اتحداك تلاقي شي محرز تسرقو .. المهم ...وكنت عم بحكي مع مجموعة اصدقاء بالمسنجر وبتحايل عليه .. وفجأة قبعت معو الاخ .. وصار يبعت اشياء ويكتب حكي من الاخر ... من الحلقة الاخيرة .. وانا بطلت قادرة استحمل .. لاجي صديق عندو نخوة عربية كمبيوترجية أنتي فيروسية وبعتلي الانتي فايروس .. وصارت حرب عنيفة امتدت لساعة واحدة فقط اوقعت اصابات في صفوف العدو الفيروسي واسفرت عن تحرير كمبيوتري العزيز من الفايروسات والحمد لله على سلامة الجهاز المعفن الي لازمو فورمات وبدي كيير مو موضوعنا .. انا منيحة والحمد لله والوضع عندي بيزي على الاخير .. والله ما كان بإيدي افوت اكتب .. فبدكم تعذرونا سعاداتكم ... وشكرا لكل حدا سأل عني انا هيني بوزع ابتسامات ..وبعتذر منكم لاني ما زرت اي موقع وراح علي كتير اشياء .... ما حكزب واحكي اني متابعة لاني مو متابعة شي بحياتي .. من كتر الشغل مو فاضية اتابع الشغل نفسو ...
وان شاء الله قريب كتير بنزل بوست
10 كيلو كنافة حلوان العودة .... وملبسة مع كل حبة .. وكاسة عصير للنص خليه يكفي الجميع ما تكونو طماعين ...