Friday, September 21, 2007

سؤال(ن) صعب(ن) سؤال(ن) يحيرني


اوكي انا بس بدي اسأل عن بعض الكلمات الي محيرتني .. لأنو كل ما احكيها قدام حدا بيعلق .. موخلصانين ..

هلا بنحكي :

بسترجي ولا بستجري

زوج ولا جوز

بني بكسر الباء ولا بني بضم الباء؟

صينية ولا اصنية ولا صنية؟

مزحة بكسر الميم ولا مزحة بفتح الميم؟

مبارح ولا مبيرح ؟؟

اقفل الباب والضو ولا طفي الضو وسكر الباب ولا سد الباب واغلق الضو؟؟؟

22 comments:

Qabbani said...

هل يجروء
الزوج
بٌني
صوانِ السفرة , صواني , صينيه

مَزحة من مزحة يمازح ممازحةٍ

البارحة

اكبس الضو , و خد الباب بإدك !!!

:P

Anonymous said...

qabbani:
هههههههههههههههههههه استخدمت كلمات تانية .. سورية .. لووووووووووووووووول حلوة هاي عجبتني ..انا بس بدي اشوف اختلاف اللهجات وفي حدا بحكي متلي ولا انا هبلة لحالي بحكي هيك ..
وبعدين خد الباب بإيدك؟؟لووووووول حلوة هاي هههههههههههههههههه

Life said...

مكتة... واللا متكة؟؟
إِِمي.. بكسر الألف واللا أمي... بضم الألف...
غرفة... بفتح الفاء واللا غرفة بكسر الفاء؟

اكون ام لا اكون؟؟

عزيزتي join the clup انت مش هبلة.. عسلامتك..
بس مش لحالك بتعاني.. انا شخصيا بحس حالي فضائية جدا قد ما ناس بعلقو على كلامي..
انا خليط من اردني كركي على عراقي..
و غيري بكون خليط فلسطيني حيفاوي على مش عارف شو...
ف انا بحكي أَمي(بضم الألف) فاتت عالغرفة(بفتح الفاء) وشوفي التعليقات..

برأي... هاد غلط..
اتركو كل واحد يحكي بطريقتو ..
بلدنا فيها مش بس تنوع جنسيات.. لأ.. فيها كمان من كل بلد تنوع قرى و مدن ولهجات.. هاد غير الثقافة واشياء كتيرة تانية!
بس الناس ما بتقدر.. لازم يعلقو و يطلعو مية عيب...
فاانسي و طنشي!

بس الفكرة حلوة كتير و بتضحك :)
sorry for the long comment!
but I am improving in arabic typing :) Yaiiii

Anonymous said...


بستـرجـي
زوج بـالفصحـى و جوز بالعاميـة
بنـي بكسـر الميـم
صينيـة
مـزحـة بفتـح الميـم
مبـارح
اطفـي الضـو و سكـر البـاب

Anonymous said...

life:
لوووووووووووووووووووووول يا حياة .. حيرتيني بزيادة ... بكفي هاي الكلمات الي حطيتها .. انا بحكي غرفة بكسر الفاء وبحكي امي بكسر الألف ..
وانا كتير بعاني من هاي الحركات .. خصوصا بنات عمتي بضلهم يعلقو .. انا بحكي احيانا مبيرح احيانا مبارح احيانا بني بالكسرة ومزحة بالكسرة ما بعرف ليه .. لووووووووووول بس انا وضعي بعجبك من الاخر ...
طيب فظل ولا فضل؟؟ وظعي ولا وضعي؟؟ لهجات هاي لهجات واختلاف اللهجات ما فيه شي .. بس انا بضلهم يعلقو انو غيري يا بنت .. حرام عليهم .. :: واحد بحاول يحكي يسترجي ويستجري ومو عارف الله وين حاطو :: والبلوج على حسابك يا قمر ..
:: وردة حمرا ::

noura:
لووووووووول انا بحكي بستجري ..واطفي الضو وسكر الباب ... والباقي متل ما كتبتهم لحياة .. لوووول صعب ..
:: واحد قاعد يجرب يزبطو معو او لاء ::

darkrain said...

ما تبعي كثير على فرق اللهجة واختلاف الكلمات
شكرا على سؤالك
انا عايش ومش عايش في الامارات ومش عم يحتك كثير بالنت الا لاسباب البحث عن عمل فقط لا غير
ودمتِ

Amjad Wadi said...

والله جيبتيها عالجرح .. موضوع حلو

زي ما حكت حياة .. كل واحد يحكي لهجته على الطبيعة بتكون حلوة ومعبرة أكثر

: بسترجي : لهجة مدنية
ولا بستجري: ريفية .. بالقريه هيك بنحكي

زوج : فصحى
ولا جوز: عامية

بني بكسر الباء: دارجة في فلسطين و سوريا و لبنان
ولا بني بضم الباء؟: بالاردن و هاي فصحى

صينية ولا اصنية ولا صنية؟
لووووووووول
هذول القرد ما فصلهم
بس الصح صينية .. والباقي تخبيص

مزحة بكسر الميم: فيه حدا بحكي هيك ؟؟؟ حد علمي

ولا مزحة بفتح الميم: هاي الفصحى

مبارح: لهجة اردنية و بعض مناطق فلسطين
ولا مبيرح : فلسطينية .. في بعض المناطق
و كمان بحكو سيعة بدل ساعة

اقفل الباب والضو ولا طفي الضو وسكر الباب ولا سد الباب واغلق الضو؟؟؟

هدول كلهم لهجات عامية .. والصحيح : أغلق أو سد الباب .. وأطفئ أو افصل النور

Anonymous said...

darkrain:
اهلا اهلا .. كل عام وانت بخير .. .. هلا انت وصلت الامارات؟؟ يالله بالتوفيق ان شاء الله .. وانا ما بتبع كتير بس في غيري بتبعلي :) :: واحد كل ما يحكي كلمة بوقفو يتفلسفو ::

bos6ar:
لوووووووووووووووووووووول يا معجم البسطاري العربي .. انا بحكي صنية بفتح الصاد وكسر النون :: لووووول ::
وبحكي احيانا بني بكسر الباء واحيانا بضمها .. خليط عجايب انا .. بس انا هيك ماخدة راحتي يالله .. واه اه استنى انا بحكي مزحة بكسر الميم وبحكيها بفتح الميم بحكيلك تخبيص حسب الحالة ..
واول مرا بسمع افصل الضو .. :) والله .. وبعدين احنا بنحكي بالعامية بكلامنا .. وبعدين كلمة جوز خطأ ما لازم تكون حتى بالعامية .. زوج مو جوز جوز الهند هو الجوز .. ليه بنحكيها هيك ما بعرف...
:: بسطار قديم ومعجم عربي مدني قروي من الاخر ؟؟ :: متعدد المواهب :)

Anonymous said...

lol...
mosh hal 2ad, walla 5arba66eeni

Anonymous said...

أيوااااا...
عالوجع...
شوفي نحنا شركس فأوّلاً بنحكي بكل تمنا، يعني بنستغلّ كل فراغ بالتجويف الفموي مشان ننطق الحرف...
تانيا! بنحكي كلمات عجيبة و بنضيّع بين عربي و شركسي و تركي... زي كاسة و ستكان... نحنا بنقول بالحياة الخارجية كاسة، بس بيناتنا بنقول ستكان (اكيد سامعة فيها! ولّا عم بحكي فضائي؟ ;-p)
و طلعت الكلمة أصلاً تركيّة!!
بعدين انّو بنحكي عن الكاسيت "شَريط" بفتح الشين، و بيجينا كتير تعليقات انّو اسمو "شريط" بتسكين الشين...
دلّة القهوة بنحكي عنها بكرج، و كنت أفكرها كلمة دارجة بعدين اكتشفت انو في ناس كتير بنصدموا منها!!
سو يو كان سي انّو عادزي عادزي...
زي ما قالت حياة: ولكم تو ذي كلَب!!

و في خبر آخر:
عنّا بالمكتب كتير بتخوّتوا عبعض الشباب بهادا الموضوع لووووووول
يعني الموضوع مش جديد عليّ أبداً..
يعني قوس قزح اللي بيطلع بمكتبنا الو خمس ألوان:
إسوَد (بكسر الألف)
إبيظ (برضو بكسر الألف و بالظاد و ليس الضاد)
إزرَق (بكسر الألف)
حَمَر (اللي هو أحمر يعني)
خَظَر (اللي هو أخضَر)
بس كيف؟ لووووووول

Anonymous said...

hisham:
صح بخربط؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ولا بلخبط؟؟؟؟؟؟ :)
عنجد انا بس بكون عم بكتب بحكي بحكي التنتين بعدين بقرأها منيح وبطلع انو انا بحكيها هيك ولا هيك ..
:: واحد ملخبط ومخربط كتير ::

naryat:
لوووووووووووووووووووول معجم اخر متنقل .. ايوة عمي طلعو المواهب ..
اه هلا الشباب طريقة كلامهم بتختلف عن البنات .. كتير منهم بحكي بالظاد بدل الضاد .. وهيك حركات سو هاي الحركات يا حبيتي متعودة انا عليها .. بس الكلمات الاخرى الي حكيتها صراحة هي اول مرة بسمعها ..وبعدين انا بتعلق كتير على كلامي كمان ..
وبعدين هي مكتة ولا متكة؟؟ مرتبان ولا مطربان؟؟؟ خدلك كل يوم بتطلع معي كلمة جديدة ...
:: واحد مسبهل على كلمة شريط الي مفتوحة الشين تاعيتها ::

Amjad Wadi said...

لووووووول
انتي بتقولي صنية؟
بتلاقي بنحكي صيييينية بس انتي مش دارية عن حالك
- هاي الفلسفة اللي بتجلط .. واحد بخلي حاله بعرف كيف بتحكي .. وكيف لازم تحكي أكثر منك

أكيد بمزح معك

بس صينية أو صنية بالكسرة قراب على بعض و ما بتميزوا ..
بس انا قكرت بفتح الصاد

وأفصل النور .. يعني افصل التيار الكهربائي

و انتي و كلماتك على راسي


Naryat

احنا كمان في اربد بنحكي هذول الكلمات الي حكيت عنهم

"شَريط" بفتح الشين،
دلّة القهوة بنحكي عنها بكرج،

إسوَد (بكسر الألف

Amjad Wadi said...

طيب
كـَبــيــر و صـغــير
بقتح الكاف
والا

إكـبــيــر
و إصــغيــر
بالتسكين

أحنا بنستعمل الاولى

Anonymous said...

bos6ar:
لوووووووووول ههههههههههههه اه اه انا بحكي صنية بفتح العين :) يعني بفتح الصاد .. ليه بتضحك شو فيها يعني؟؟
:: واحد مستغرب ::
وبعدين احنا بنحكي كبير وصغير ما بنحط همزة القطع .. وبتعرف؟؟ احيانا انت بتحكي الكلمة بس بما بتنتبه على حالك بس لما تركز كتير بتلاقي انو اوبس انا بحكي الكلمة شي وانا مفكر حالي بحكيها شي تاني ..
:: واحد ما بخلي حالو هو اصلا بعرف شو بتحكي وشو ما لازم تحكي :) ::

Life said...

اضافة بسيطة..
أذّن... (الأذان--> المسجد) واللأ وذّن..

ما في جواب.. جدي كركي مأصّل عايش بالمدينة.. بحكي (وذّن) بس ابوي كمان كركي مأصّل وعايش بالمدينة.. بحكي أذّن..
سو.. في خلاصة اخرى.. انو مش بس الأصل بأثر..لأ وكمان العوامل الأجتماعية.. مثل الشغل.. والناس اللي بتختلطي فيهم..
امبارح بحكي لماما.. (برمنا) السوق كلو..
انصدمت.. بتقلي من وين جايبيتها برمنا هاي..
أحنا بنحكي (لفّينا).. و في ناس بتحكي(فتلنا)
بالنسبة النا انو شو فتلنا هاي.. !!!


ههههه طلعت الأضافة مش بسيطة :] شوي اكتر من بسيطة.. :) بس انتي حكيتي على حسابي :)

Amjad Wadi said...

ما هيه كبير .. بتسكين الكاف
بس بتطلع معي بهمزة و كسرة

عمي كل واحد يسولف لهجته .. وكل واحد بنام عالجنب اللي بريحه

Anonymous said...

والله الموضوع بحير لأني بحكي كل الكلمات على الجهتين ... يعني حسب اللي بتعامل معه

و في لسه كلمات أكثر بصير عليها نقاش، خصوصا إذا كنت في المكتب وحكيت مع البيت قدام الشباب... بكلب فلاح كح، وبصير أحكي(بتفخيم الكاف) كالو وكلنا وكلتللو و إنتو أكيد عارفين الفلاحين كيف بحكو..

W. said...

msh mohem sho ma kan ykoon el mohem toosal el fekra .. law bdi abdaalek b list el kalemaat elle bte5talef bel no6oq mn kasra wa fat7a ela5 ela5 ma ba5las :D

ensaaaki y5ti ensaaki

Anonymous said...

اختي انا كمان بحط بكل جملة كلمة من لهجة ثانية.. شاذة عن اهلي هههههه

بسترجي
زوج ولا جوز.. جوز كلسات
بني بكسر الباء ولا بني بضم الباء؟ حسب مزاجي :)
صنية
مزحة بفتح الميم
مبارح
اطفي الظي وسكر الباب


مكتة
اذّن
برمنا السوق
ئال وئلنا
اسا باجي
السيعة وحدة صارت

بتفهمي علي شو عم بحكي؟

Anonymous said...

و الله اللهجة عندي ميمعة, ابوي و امي من فلاحين الضفة و بالحارة تعلمت
(agol)
و في الشغل مديري كان لبناني يئبر ئلبي و في شباب مصريين فإنسي الموضوع و اطفي الضو و سكري الباب و إطلعي من راسي, هاي مزحة (بفتحة على الميم) عشان ما تفكري اني معصب

Anonymous said...

life:
لووووول انا بحكي أدن مو ودن ولا أذن .. وبحكي لفينا بالسوق مو برمنا .. واضافتك البسيطة الي ما دخلها بالبساطة بينتلنا انو فعلا الانسان بلهجتو حسب مع مين هو بتعامل .. يعني تلقائي بصير يحكي متل غيرو .. مرة اتصلت فينا صاحبيت ماما مصرية وسحبت معها مصري وانا مو عارفة .. فضيحة لما تنسجمي ...
واهلا وسهلا البلوج وصاحبية البلوج على حسابك ..
:: حبة شكلاتة وواحد جوعان بستنى الأدان يأدن وماسكها قريب من تمو ::

bos6ar:
اكبيرة؟؟ لا مو إكبيرة .. عادي كبير وصغير ... بس فعلا اللهجات بتلعب دور .. وما حدا حيحكي معك كلمة لأنك بتحكيها هيك .. والي بيحكي معك كلمة انت بس احكيلي .. وانا حأيدو ان شاء الله :: واحد بيضحك على حالو ::

bahloul:
مزبوط كلامك انتو الشباب وضعكم من الاخر .. بتتغير لهجتكم حسب المكان..
يعني بعرف كتير ناس مثلا ازا بيحكو مع بنت بنعم الصوت وبيحكي بالئال وؤلنا .. وازا حكى مع امو واخواتو بيحكي عادي بالكال بتعلى الموجة .. وازا حكى مع صحابو بالكال المفخمة .. وازا حكى مع اعداؤو .. التكملة عندك ... يعني اللهجات فعلا عندكم بتختلف اما البنات قال نعومات دايما ..
:: واحد جوعان ميت جوع بستنى الادان .. شو دخلو بتعليقك؟؟ ما الو دخل بس حبيت يعني احكيلك اني ميتة جوع ورديت عليك شايف ما احسني ::
:)

Anonymous said...

wedad:
احيانا الناس بنسو الفكرة وبيصير اهتمامهم كامل على اللفظة وممكن كتير ما يقدر يمسك حالو فيصير يضحك قدامك .. مرة صارت معي :: وجه محرج :: انو اي فكرة الي بدي اوصلها ؟؟ بالاخير ما عم بيطلعو على الفكرة كانو عم بيطلعو كيف حكيت كلمة .. والي متل هيك بيكون انسان سخيف بس للأسف كتير السخيفين ..

mnoshe:
منوشي قبل كل شي انا جووووووووووعانة ولك .. بدي اكل متى بأدن ..
هههههههههههههههههههههه الكومنت تاعك تحشيش ولك .. ضحكيتني مع اني ما بدي اضحك عشان ما ابدل طاقة :: واحد بيغمزلك :: المهم معظمهم ولك انا بحكيهم بس انا الضاد بتتحول لضاد مخففة قريبة من الدال فما بحكي الظي بحكي الضو .. بس لهجات .. اهلي بفلسطين هيك بيحكوها ..وما بحكي إسا باجي بحكي هلا او هلأ او هسا باجي ... حركات بعيد عنك ..
:: واحد بشكيلك من الجوع وبدو يوكلك محامي .. الك مصلحة منوشي؟؟ ::
وينك انتي صحيح تعالي لهون زمان ما شفناك ؟؟؟ اشتقتلك هبول يالله خليني اشوفك ..

sel3:
لووووووووووووووووووووووووول لا مو لهالدرجة انا ميزت انك بتمزح ولوووووووووووووول على الفلم الهندي تاع اللغات ،، حظك ، انا بحب كتير اني احكي معظم اللهجات شو ما بدك بتلاقيني بحاول بس مو دايما بتزبط لأني ما بحتك مباشرة مع الناس الي لهجاتهم غير فالي بدي اوصلو يعني واختصر عليك وعلي لاني ببدل طاقة وما بدي اخلصها باقي ساعتين للأدان المهم لو ما حكيت هالسطر بختصر اكتر المهم :: واحد بتهبل :: انت استفيد واتعلم حلو لشخصيتك المرحة ..
:: اليوم ما في شي للأكل ضيافة .. في اني جوعانة قد الدنيا .. واحد بتمسكن للشيخ بلكن خلاها يفطر ::