Friday, May 22, 2009

ملفات اخرى





العمل بالمدارس الخاصة يعني مهمة مهلكة تماما ... قبل ما اصير انا معلمة بالمدرسة المشؤومة اختي اشتغلت معلمة اول ما تخرجت بالكلية العلمية الاسلامية ... وان كيس ( محاولة للتحضر معناتها الهندي في حال ) ما حدا بعرف قرف التعامل مع المدارس الخاصة .. فممكن تكون هاي المدرسة اكتر مدرسة التعامل معها مؤذي من الناحيتين النفسية والجسدية .. وطبعا اختي ما تحملت تركتهم من الفصل التاني ودفعت البند الجزائي الي كان عليها واشتغلت بالبنك ... كان وئتها المدير العام للمدارس الدويك ... بعد فترة اقالوه لانو اتوقع كان مريض نفسيا بطلع كل مرضو على الطاقم التعليمي والاداري .. بيحكو صارت المدرسة ارحم شوي من اول مع استلام الادارة العام شخص تاني ... هلا المدارس الاردنية الدولية الي انا بشتغل فيها صارت افظع من الكلية العلمية الاسلامية بسبب انشغال المديرة :: زوجة الدويك :: بمئاهرة المعلمات وعمل بعض التصرفات المزعجة متل اختراق كل القوانين البشرية والعمالية وكل شي بدكم تعرفو .. يعني نئلت وباء مرض الدويك من الكلية العلمية للمدارس الاردنية ... ما عاد في بني ادم بدو يضل عندهم .. طاقم الاساسي ما ضل منو غير 4 معلمات من اصل 25 اشي هو طفش واشي هم فنشوه..

سياسة المدرسة بعد المديرة الجديدة ما استلمتها ...:

اولا المديرة هاي ما عندها اولاد ... وعلمكم لما مرة متسلطة فاضية اشغال واعمال تستلم ادارة مدارس ضخمة .. اول شي بتعملو بتبدأ تتفلسف على المعلمات .. وبتبدأ اطلع كل الامراض النفسية وعاهاتك يا وطن بالمعلمات .. وخصوصا معلمات الاساسي ...


فرق كبير بين التعامل مع معلمات الاساسي والثانوي ... وهي بعض الفروق وقارنو :

1) الاساسي بشغل بكل طوابق المدرسة اما الثاوني ما بشغل الا بطابقو .. وعلى هادا الحكي احنا ازا بكون عنا 6 حصص يوميا من اصل 8 حصص بنشغل السابعة ..ومو بس هيك ... بنشغل عند النبات الكبار .. وشوفو المسخرة

2) الاساسي ممنوع يشوفوكي ئاعدة لانو يعني انتي هيك ما بتحللي الفلس الي بتاخديها .. طيب نصاباتنا كتيرة وشغلنا متعب خلونا نئعدلنا حصة .. بمرضو .. طبعا الثانوي ما حد بيحكي معهم وين رايحين ..ولا ننسى انو شغل الاساسي ما بعرف من وين بيجي .. والله بطلعو الشغل من تحت الارض .. وبعقدو الامور لما بدهم يعقدوها ... بتصير الوحدة بدها تغتال المسؤولة عنها ..

صحيح نسيت احكي انو من الاسباب الي حتنهار المدرسة بسببها وانا متأكدة والكل نازل اسافين بالتاني .. هو انو في اكتر من راس كبير بدو يثبت حالو... مثلا انا مسؤول عني 6 ادارات .. المديرة العامة للمدارس الدويك .. والمشرفة العامة للمدارس ... وبنت صاحب المدرسة ... ومديرة قسم الاساسي المديرة المباشرة ... ومشرفتين لغة انجليزية ...وكل حد عندو رأيي وبيزعل ازا ما طبئتيه ومين بروح فيها؟؟ احنا المعلمات ...

3) لما يجو يختار المعلمات .. الثانوي بختاروهم على الخبرة ... الاساسي بيختاروهم على الحلاوة .. وللاسباب التالية :


أ) لازم لما يجي الاب يتعامل مع الملعمة يشعر بجمالها الخلاب .. ويبطل يركز شو بدو يحكي او يبطل بدو يشرشح ..

ب) لازم المعلمة الحلوة تكون لزيزة مع الاطفال .. اما ازا كانت بشعة بخافو منها الاطفال ... وببطلو يحبو حصتها .. وتعالو وشوفو طاقم المعلمات عنا بالمدارس اتحداكم ما تحكو نفس هالحكي .

ج) المدارس كتيرة برامجها الترفيهية ( بتسوق لنفسها عن طريق المهرجانات والالعاب وبتنسى التعليم نفسو ) وبما انو برامج المدرسة كتيرة فبكونو معلماتها الحلوات باستقبال الاهالي بمتل حفلة عيد الام و اليوم المفتوح وهاي الحركات الفاضية ..

بتزكر وئت عيد الام ... ئعدنا نشتغل شغل مو شغلنا ... نعمل كروت للأمهات قال ونعمللهم هداية وشموع مع طالبات صفنا .. وطبعا راحت حصصنا لمدة اسبوعين بين الاعمال الفنية وتدريبات البنات على الفقرات ... تحولت حصص الانجليزي لحصص فن ودراما الحمد لله والشكر ...

واسباب اخرى طبعا ..

غير انو لازم احنا معلمات الاساسي نشتغل شغل مضاعف ..

انا شخصيا دخلت نظام جديد اسمو ورق العمل المكثف : من هبلي طبعا :: وكان بعتمد على اكتر من ورقة عمل واحدة للوحدة ... بالاضافة لتلخيص الوحدة كاملة ... مع رسومات واشياء .. وكل شي مطبوع على الكمبيوتر .. بس للأسف صارت معي مشكلة ببداية الفصل الثاني .. وسببها نئل حكي كزب من احدى طالبات خامس لاهلها .. وهون بننتقل للنقطة الاهم ... انو المعلمات غير محميات بالمدرسة بسبب سياسة الدويك ... الاهل دائما على حق .. واكتر من مرة مشرفة الاساسي بتحكيلي انو اعتبري نفسك بمطعم والزبون دائما على حق ... عادتها اكتر من مرة رحت عصبت وحكيتلها .. احنا هون مو بمطعم ومو جايين نرفه الاولاد والطلاب .. احنا هون بمهمة تعليمية .. وبحال انك نسيتي يا مس .. احنا هون بنتبع لوزارة التربية والتعليم ومو لوزارة السياحة ... ( كنت حاخد انذار :) ::

وبالاخير بحكي .. انو الشغل بهيك مدرسة ئرف ... وازا كانت كل المدارس مئرفة متل هيك فالله يغنينا .. لانو بالنهاية شو الراتب الي بناخدو على التعب الي بنتعبو ؟؟؟ ولا بنروح شغلنا معنا ... والله احيانا كنت انسى اكل من اد ما مرئت علي فترة صعبة ومو فاضية فيها ابدا.... غير انو ما في امان وظيفي ... ابل يومين فنشو 7 معلمات كانو مجددين معهم عقود للسنة الجاي .. طبعا لا اخلاق ولا ذمة ولا ضمير ... ومعظهم معلمات مسكينات .. متى فنشوهم؟؟ لما اطمنو المعلمات انهم خلص حيشتغلو هون وما راحو دورو على شغل تاني ... طيب هاي مو نذالة؟؟ على اخر السنة بعد ما صارت المدارس موقعة عقود مع المعلمات الي بدهم اياهم؟؟

بس الظلم بهاي المدرسة على كف مين يشيل ... وانا وقعت لا ارغب من البداية لاني سعيدة اني تخلصت من هيك ناس :)

والله الو حكمة لما خلى رزئة العبد بإيدو ومو بإيدين الناس

هيك شكل اوراق العمل الي بعملها:





10 comments:

Anonymous said...

واو
كل هالمصايب موجودة بأحد المباني التعليمية اللي مفروض تكون اشي مفخرة ومكسب للناس اللي بدرسو فيها

فعلا براء .. وانتي بتحكي عن اهتمام المدرسة بالمناظر والنشاطات , كانك بتحكي عن شي فرع تابع لعنصر الجذب السياحي , loolكله كوم
والمعلمات الحلوات كوم:D

هادا معناه لازم يجيبو هيفا وهبي
وتقعد تغني على الطابور الصباحي

اللي يزعل اخته .. نوتي .. واللي تزعل اخوها !!!
.... GoOD , GoOD

جد كفاكي الله , وبلاكي من كل وجعة هالراس
ان شاء الله ربنا بعطيكي بدل كل هالتعب الي طعموكي ياه , الواحد بهيك حالة بنسى انو اي لغرض حضاري ومستوى عالي , وهو التدريس , وببلش بمجاكرة فلان , وسمع وتطنيش حكي علان
انا دايما بحكي لامي , لو اقعد 100 سنة ما بصير معلمة . لاني كنت شوف البلاوي للمعلمات بسبب البنات , والطاقم المسؤول :S

بس زعلت كتير براء :(
الصور الي نزلتيهم لاوراق العمل كتير صغان :D
ما قدرت اكبرهم او اشوفهم
مع انه شكلهم بجنن كتيير

يا ريت تخلينا نقدر نكبرهم :)

Unknown said...

والله مش عارفه شو بدي أحكيلك بس متوقع!!!
يعني خاصه المدارس الخاصه بسمع عنها كتير سمعات ومهما يحاولوا يقنعوني انو وظيفة المعلمة "مريحه" بصراحه مش مقتنعه بالمره!!!

وبعدين وانا بقرأ بحكي شكلها استقالت من عندهم :)

ملاحظه عالهامش:افهم من هيك انك حلوة ولذيذه؟:) تبع السياسه تاعتهم
واكيد شطوره كمان:)

الله يبعتلك شغل احسن منه قريبا

Whisper said...

الله يعينكم
انا بكره التدريس جربته لفصل بكليه الاندلس بس حرّمت, حضري و اشتغلي بره واشتغلي بالبيت...جد الله يعينكم

وانا بقرأ حسيت وحده من بنات خالتي اللي بحكو...التنتين مدرسات في مدارس ويل نووون ( بالهندي برضه) و بعانو من زناخه الاداره, وحده منهم بتدرس الاطفال و كلهم بحبوها و شغلها ممتاز, بس تعاملها مع الاباء بجديه لانها ما بتحب مساخرهم فواحد منهم نئحت عليه كرامته وراح شكاها انها ما بتتأكد ان ابنه اكل التفاحه كل يوم !!!
وطبعا المديره نادتها و قعدت تشكر فيها ساعتين وبالاخر بتحكيلها الشكوه راح تنحط بملفك ورجاءا تنتبهي مره تانيه لان رضى الكستمرز ..قصدي اولياء الامور مهم عنا :(

sweetlikearose said...

enas:
شايفة بالله عليكي؟؟
هادا هو الصرح التعليمي ولأجل هيك بشر بتكرهي تكوني معلمة ... كتير شباب بحبو يرتبطو بمعلمات عشان قال بالنسبة الهم المعلمة افضل شي للبنت .. بس بالنسبة الي انا لما اروح الساعة 3:30 يومي ولما اخد شغلي معي بالبيت واترك كل اشغالي واعمالي المنزلية وابلش بالدفاتر والتصليح والامتحانات واوراق العمل فعليا انا بشتغل اكتر من الي بشتغل للساعة 6 ... وتعبانة نفسيا مليون مرة اكتر منهم ... بس بالنسبة الي كانت تجربة وحعتبرها حلوة مو بشعة بس متعبة جدا ... واكتر الاشياء المتعبة متل ما حكيت الادارة والله ...
وبالنسبة للأشكال والله والله يا ايناس انو صاحباتي المجلببات بطلبو منهم يفيعو ويشيلو الجلباب ... وكتير بتحسي عندهم حرب على الاخلائ ...
بالنسبة للصور كيف بئدر اكبرهم؟؟
احكيلي كيف وولا يهمك على طول بنزلهم :)


مياسي:
اصحك تقتنعي اصحك .. متل ما سبق فوئ وحكيت لايناس انا انتهت حياتي الاجتماعية لاني نظريا بخلص دوامي الساعة 3:30 لكن فعليا بخلص بالليل مع التحضير واوراق العمل والامتحانات او التصليح لانو الله وكيلك كل شي بتصلح ...
وبالنسبة للاستقالة انا وصلت بيني وبينهم محامي ... بس لما مشى الي بدي اياه كملت هالسنة عشان اخد الخبرة وقدمت استقالتي وما عندي استعداد ارجعلهم ابدا .. وغير هيك بعد الايام عد عشان تخلص هالسنة ..
ووفقا لسياسة المدرسة فيكي تحكي يمكن :: ابو للتواضع انا بس :: :)


Whisper:
عارفة يا همس والله والله بدئرولك على الشياء عيب عيب كتير ينحكى فيها ... الشغل شغل اه بس احيانا بكون الطرف التاني خطأ :: معظم الوقت خطأ :: وبيجو ببهدولنا احنا ... بس بتعرفي الكرامة اهم شي بالدنيا ... صحيح انو الدنيا مو سهلة بس الواحد يحفظ ماء وجهو وانا طلعت وغبت وعملت الي بدي اياه .. انا بحترم العقد الي بيناتنا ومستحيل اظلم طالباتي لاني محاسبة عنهم .. لكن كإدارة تستحق انها تتغلب معي بعد الي عملتو ..
الله يجيب كل شي فيه خير ..
وان شاءالله ما اضطر اكون معلمة بعد هيك ..
بالك شو في وظائف للأدب الانجليزي؟؟
:: وردة يا هلا ::

Anonymous said...

اكيد براء , ولو بقدر احكيلك ونص :)

وان شاء الله تزبط معك

ارجعي للبوست نفسة بالeditبس المشلكة بدك تشيليهم وترجعي تنزليهم مرة تانية
بس هالمرة اختاري يكون حجمهم
Largeمش small او Medium

مشان يتكبروا .. نضغط عليهم ..ونقدر نشوفهم :)

sweetlikearose said...

enas:
thanx for telling me BAS MA ZAB6AT M3E ..:(
any other ways?????????????
ma ba3raf fe nas bektobo click to enlarge ... HOW???????????

vagueraz said...

salam ,,

Allah y3eeenek :) fe3laan .. ana b23od b el beet wala bashtagel
m3lmeh !!!!!
enshalla allah byrzo2ek shogol tany terta7ii feee :D .....

Amma shu b el nesbeh 6aqam el m3almaaat el 7lwaaaat , LOL.. e7na jayeeen ndares wela mosabaqet jamal !!!!....

Bthooon 3la Kilo Laymooon :D :Pp lol

sweetlikearose said...

roro:
LoOoOOoOOoooOoOL 3la kilo laymoooon :P hehehehehhehe sayre dawaween ya benet :P
razone mata bede ashofekkkkkkkkkkkkkkkkkkkkk??? yallah decide .... 7aleyan i'm sick sick sick bas enshallah betroo2 el2wda3 qarebaan .. w then i want to c u .. shedelna 7elek ..
w she tane .. mdawanat jeran ma 3m tefta7 2nde ... WHY??
belnesbe la6aqam elta3leem 95% menhom mo metzawjat wala 5a6bat .. malat 3lena w 3la 7lawetne :P

:: killo laymoon 7ata 2omorek thoon :P ::

vagueraz said...

Salamtek :) ...
enshalal ,,, ,we have to see each other ...
I'll contact you :)

sweetlikearose said...

roro:
thanx for calling sweetie .. we enshallah we'll stay on touch :)
:: 7abet chco lazezeh :P ::