علاء الدين وانا :)

هاي علاء الدين هي اللعبة الوحيدة الي ممكن اقعد عليها اكتر من نص ساعة وانا العبها ... زمان على ايام كمبيوترنا القديم الله يرحمو ويعفو عنو :: الفاتحة على ارواح المسلمين انتم السابقون ونحن اللاحقون :: المهم كمبيوترنا القديم كان اول ما اشترينا واو سريع وما احلاه بس انخدعنا فيه سنة سنتين تلات والرابعة بدأ يبطأ والخامسة سلامتكم والسادسة ها والسابعة هيو محطوط بالممر عشان نلعب عليه الالعاب .. يعني المفروض يخدمنا 10 سنين على القليلة عشان يقولو اهلي :اه صار قديم شوي لازمكم كمان واحد ؟؟
المهم ، بس بلعب علاء الدين بتصيبني حالة غريبة يا اخوان ... انا شاطرة بأول خمس مراحل :: التكرار بيعلم الحمار :: قد ما بلعبهم بتشاطر فيهم .. وعلى مين؟؟ على اختي الي بالصف الرابع:: :× كتمو على الموضوع:: ... هادا يا اعزائي علاء الدين بالمرحلة السادسة الي اسمها ذا ايسكيب .. والي ثقافتو انجليزية اسمها الهروب .. هادا علاء الدين مو مصلي على النبي :: اللهم صلي على سيدنا محمد :: مو راضي يتعاطف معي ويمرء من هالمرحلة ... لا واسطة ولا زفت مطين ماشي معاه .. في صخرة بضل توقع على راسي .. وتحققت اللعبة وقبل يومين وقعت صخرة على راسي .. :: حتسألو: ليه هي كمان الالعاب بتتحقق؟؟ بحكيلكم طنشو واعملو حالكم ما سمعتو :: الزلمة مو راضي ينط .. ولك نط .. الي بتنط هي حرف الدال ... خربتو يا جماعة على الفاضي انو يستوعب هالعلاء الدين ما في فايدة ... قد اسمعت اذ ناديت حيا لكن لا حياة لمن تنادي ... هلا الشي الي قاهرني بكل هالموضوع هو انو اللعبة بتحتاج لتركيز كل فكري وايدي باللعبة .. ما بنفع اترك ايد مثلا ... بس وين الكارثة؟؟ كل ما ابلش باللعبة بيصير شي بوجهي يحكني .. مرة شعري :: يالله والله متحممة بشامبو دوف :: مرة عيني مرة خدودي ... والله كل مرة شي ... وببطل اركز ابدا ... بتضرب معي الامور فبخسر ... طيب شو اعمل مع علاء الدين الي مو راضي يقدر هالموقف؟؟ جلطني ... بدي افوز يعني بدي افوز... هلا في ظاهرة جديدة ... حرف الدال يا جماعة عفن مو راضي ينط .. وينط للي ثقافتهم اجنبية معناها قفز يقفز قفزا ... استغفر الله ... يعني شو بدي منك يا علاء الدين غير تتعاون معي افوز هالمرحلة ؟؟ فضحتني قدام خواتي .. والعرب ... شو حيقولو عني النشميين ؟؟ مو عارفة انط من صخرة لصخرة؟؟؟؟؟؟ لا وبعدين بس اخسر بيطلعلي هادا القرد بيطنطنط .. قال تعيدي اللعبة ولا لاء؟؟؟ شو رايك يعني؟؟ اكيد اه .. بس اختار اه ...برجع بخسر بقول هلا بيطل القرد الحليوة :: القرد بعين امو غزال :: بقوم بيجيني الشرير بيحكيلي يو جيف اب .. يعني استسلمتي للي ثقافتهم سويسرية .. طيب ما استسلمت انت استسلمتني من حالك .. بقوم بكل شرف عن اللعبة بس يحكيلي هيك .. بلاش لا يفكرني عنجد استسلمت هادا ترا بدو اياني اعيد من مرحلة واحد ... شو جايني من وراكم؟؟ حل عني ....