اللغة الانجليزية
الانجليش للي ثقافتو يابانية
انا بحب الانجليزي ومن وانا صغيرة .. بس لما كنت بالخامس :: يرحم ايام الخامس كنا ناخد اي ابيل :: مو زي ايام هلا .. المهم .. من وانا بالخامس الله بعتلي معلمة انجليزي الله يسهل عليها كانت بس همها شعرها واظافرها وتدور على مبرد ومين معاه علكة .. كانت تمسك دفتري وتشرح من الامثلة الي كنت انا احضرها .. وبالاخير اخدت بالسبعين .. انا طول عمري الحمد لله متفوقة .. بس يعني لما معدلك يكون 79 بالانجليزي والمعدل بشكل عام بطلع عن تسعين مصيبة هاي .. والكل يبهدلني والحالة حالة .. طبعا لما صرت سادس شرفت نفس المعلمة .. ونفس الشي عملت .. ونفس العلامة 79 .. واجتني بالسابع ونفس الشي ونفس العلامة .. يعني ازا كانت اهم مادة بدها تأسيس من اهم السنين .. خامس سادس سابع ما اسستني .. معناها يعني انا بدي اطلع انا ودفعتي حمير من الاخير .. كنت اشك انها بتغير دفتر العلامات .. ما بتغيرو .. هو هو من تلات سنين الله وكيلكم .. بالتامن تغيرت المعلمة والله والله صار معدلي 99 من 100 .. يالله شو كنت مبسوطة .. يعني هو عشان الحلال والحرام 198 من 200 بس يعني هادا بالنسبة الي شي اثار الفضول انو هاي الهبلة الي قبل هاي المعلمة شو كانت تعمل؟؟ بعدين بدأت اتأسس صح ومعدلي بحياتو ما نزل عن 197 بالانجليزي وانا بالمدرسة بالاساسي والثانوي كنت مجننتهم .. وتخرجت ودرسة انلجيزي .. بالتوجيهي ما احتجت اي دروس بالمرة الحمد لله .. لما صرت ادرس الانجليزي بالجامعة بدأت امور تتغير عندي ... صار الانجليزي يعدمني يومو صعب .. بس لاحظت على حالي انا صرت من هدول الفافي الي بيحكو كلمة عربي كلمة انجليزي .. بس ما وصلت فيني احكي دادي ومامي وهالحكي هادا لسا :: كدنا يا جماعة :: وبعدين قررت انو لازم اختار يا هاي يا هاي حاولت اختار الانجليزي لاني بحكي انجليزي بدراستي وبالمحاضرات الكل حكالك شوف هاي التانية شايفة حالها على شو فبدلتها بالعربي .. وصرت لما احكي انجليزي بس يكون بالمحاضرات او لما بدي احكي قدام اختي الصغيرة بتعرفش تفك الشيفرات :) حتى على مدونتي ما بحب اكتب بالانجليزي .. مو لاني ما بعرف بس لاني فعلا بحب التعبير بالعربي .. بالانجليزي بتفقد حلاوتها الكتابة ...
بحس حالي هيك ما بعرف اعبر ... بحس الموضوع لو انكتب بالعربي بيوصل المعلومة كتيراحسن من لو ازا انكتب بالانجليزي
.. وبعدين لو انت طالب انلجيزي حتزهق الانجليزي ويومو وحتصير تبعد عن كل شي انجليزي الله وكيلكم انقعوني بنقط اي بي سي ..
شكسبير،ادب انجليزي واحد واتنين وتلاتة واربعة وخمسة .. مع العلم انو لسا باقيلي اربعة وخمسة يعدمني يومهم ومالت علي حيطة مايلة فوق ما هي مايلة .. الله يخلصني ..
هادا جزء من زكرياتي بالمادة لانو انا ما كان عندي اي مشكلة او اي معاناه لما اخترت التخصص .. ما احترت ابدا .. الحمد لله على كل حال ..
24 comments:
ايوا , يعني المغزا من البوست انك من جماعت العلامات العالية ,
بتعرفي , اني بعمري ما اهتمت بعلامتي ولا اقتنعت بنظام العلامات اصلا , بتذكر مرة المرشد تبع المدرسة لما شاف معدلي 88 , عملي امتحان و بعد الإمتحان انصدم , و كان بدو يحكي مع اهلي , ال بدو يسئل ليه هيك علامتي سيئة ,ال لازم اجيب فوق ال 93 على الأقل وانا مش مقتنع بالموضوع لأني كنت مبسوط و عم استمتع بالدراسة
يلا الله يسر لك مع الإنجليزي بتاعك ده , و المستر شاكاسابير و جماعتو
سورري بس أنا إنجليزياتي على قدّي, ممكن أفهم وين كعبول الزبدة تبع البوست؟
وع سيرة الإنجليزي بالجامعة, كان طول عمري بدّي إياها ع أساس إنها بيس أوف كيك الإنجليزي كلّها ورح أظلني صايع 4 سنين.. بس أهلي راسهم ألف سيف مارضيوا وقال شو رح تعمل فيها الإنجليزي يعني؟ تصير استاذ مدرسة؟!
وهيني صرت كمبيوترجي ولسة بترحم ع الإنجليزي
:o
يعني هو الشي اللي بدي أقولو إنو أنا بحب الإنجليزي بس صراحة عمري ما استظرفتو زي العربي ، يعني ما بتاقي عندهم زي المتنبي أو أبو فراس الحمداني.
أنا نفس الشي صار معي بالمدرسة حتى إنو دايما كنت على عداوة مع أساتذة الإنجليزي حتى بالتوجيهي بعكس الرياضيات لحد هسه بتذكرهم وبتذكروني من أستاذ الصف الرابع لحد التوجيهي
qabbani:
طيب منيح .. معدلك ماشاء الله منيح .. انا كنت متفوقة بالمدرسة بس بالجامعة بمشي الحيط بالحيط ويالله الستر .. بدي علاماتي تنفضح بعدين :)
اما شكسبير فحدث ولا حرج .. انا اكتشفت انو مو شكسبير الصعب ... الاساتذة اصعب :)
adoosh:
يا سيدي ما في كعبول زبدة تاعك هاد .. انا ما بستخدم الزبدة بالاكل ولا بحبها .. عشان هيك بتقدر تحكي مكعب الماجي تاع البوست .. والصراحة انو انا كتبتو لنقاش دار بيني وبين احدى الصديقات عن ليه ما بحكي بالانجليزي على مدونتي .. ورحت انا راقعتلها اياها بوست كامل .. وانتو المساكين راحة عليكم قراية .. اكرا يا ابني الكراية منيحة .. بس بتعرف الله بحبك انك ما فتت انجليزي .. عنجد يا شو بدك تشتغل؟ازا ما كملت ماستر وفتت على مجال الترجمة عمرك ما بتفتح بيت .. هيك انا ناوية اعمل :)
bahloul:
انا بحب العربي كتير .. طبعا بحب الانجليزي بس والله العربي ما في منو .. التشبيهات حلوة من الاخير ..ما بتقدر تعمل نفسها بالعربي .. اما المعلمين ... يعدمني شيطاناتهم ولا وحدة فيهم كانت تفهم بالانجليزي بشلن .. كلهم الله وكيلك شغل بس تهواية للطلاب .. ولما كنت بالعاشر دخلو علينا 9 معلمات انجليزي .. انسالي اياه منهاج العاشر ولا حبة :)
d'rore tzakro elwa7d b msaybo ento :D?
3abo asas t2asast asas mnee7 y3ne, mashe 7alo.. bl i3dade huh nfs el she ama kona b3edna ma mn3ref n7ke jomle :D kont ajeeb 90+
bl thanawe sho aflam eng wla brad bitt :cool: bl 3asher 3 m3almat kol w7de izen weladeh shekil :dance: bl 7ade 3ashar btzkarsh el m3almeh meskat 2alam o katbt 3aloo7 O_o retha tmoot sho kont akrha (ama kant t7ebne el ...) kant to23od o t7ke : sit in ur group & share ur answers" 3a asas el ajwebeh msawerthen mn ktab el 7ollol!!!!
5alast :-o:
looooooooooooooooool ya mnooooshe ... hade mo3anatek mo3ana kbere ... ana basma3 eno 3endkom ma behtamo kter bel english ... w mara esme3et nezam drasethom .. ya wallah se3eb ... bas ente 2dha sa7??
ya sete elsara7a m3almeen el english m2asreen .. he aham madeh bedha ta2sees bas home bestas3ebo tadres-ha fabefadlo ma yadrso ... :( lel2asaf
:: forsa nehde m3almetek 2alam la2eno 5els ta3ha :P ::
ya salam 3leeki ya bara2 ,, oslobek ra2e3 :) jad ,..
ya 3mmy el english kter 7lo w ana ba7eb el adab :)
5leena nshofek b my blog :)
razan:
abel kol she .. ana ur blog elo yoomeen mo rade ysha3'el 3ende .. ma ba3ref lesh .. ente w kaman 2 blogs ... bas enshallah yefta7o 2reeb ..
w ana ba7eb el english bas ma ba7eb kter el2dab .. 3omrek shofte ballah?? badros adab w lo3'a w la hada ba7eb wala hada allah wakelek :: warde m3 qasede romanseye m3 shm3a :P ::
والله احنا كنا مبتليين بمعلو انجليزي كان يدرس بالجامعة .. ومكان يحط الشريط بالمسل: أوبن ذا ويندو .. أوبن ذا دوور ... أو .. أبو أومار هاز أ فارم .. ان ذا جوردان فالي
وبالأخير الواحد لحق حله بالانجليزي .. بالتوجيهي وبالجامعة
أنا كمان بفضل أكتب باللغة العربية .. والحمد الله قادر أكتب بلغة فصحى و سليمة .. لكن مرات بفش غلي و بكتب بالعامية
khalleeeni sakteh LOL :p
bos6ar gadeem:
لووووووووووول بتتزكرهم؟
لا وانا بالبداية ما كنت فاهمة هدول الي بالشريط شو كانو يغني؟؟ عبري عربي فرنسي شو دينهم؟؟ بس بعدني فهمت المعاني .. وسلامتك ناسية الاغنية بس متزكرة اغنية الاشهر ...
واساتذة الانجليزي فعلا شايفين حالهم .. ييييي الله يبعدني بس :)
wedad:
لا شعبري عن معابرك خدي راحتك .. معك حق اضلك ساكتة لانك لو بدك تحكي يمكن طلعي بوست .. في ناس على قد ما هم مدايقين بفتحو ديوان قصصي بهالموضوع
:: وردة ::
لووووووووول
أنا أخوي معلم انجليزي
:-)
و على راي أمي مش عاجبه العجب ... ولا حدا معبي عينه
:-)
شكله معلومتك صحيحه
bos6ar :
انا كل الي بعرفهم انجليزي .. لو احكيلك بتنصعق .. لانو حتى من قرايبيني في نسبة ممتازة انجليزي داخل البيت وخارجه .. بس انا بحكي عن القسم عندي صراحة كلهم شايفين حالهم .. خصوصا قال الحبيبة ما بيحكو مع بعض غير بالانجليزي قال .. مش عارفة على شو .. المهم انا بحكيلك هم شايفين حالهم بس وقت الرواتب والطلبات خصوصا بالمدارس الخاصة .. انو انا دارس هالمادة الصعبة هاي مدة 4 سنين بالجامعة يعني انا لازم يكون راتبي اكتر .. هيك تفكيرهم .. وانا بحكيلك معهم شوية حق .. انا شخصيا ما بقبل اخد متل ما بياخد معلم المهني .. او الفن ,..مع انهم تعبو وبدراستهم متلنا متلهم بس في درجات للصعوبة .. هلا الي تعب بالتوجيهي وجاب معدل عالي ودرس شي صعب متل الي قضاها لعب ودرس شي اسهل من الانجليزي ؟؟ وبعدين انا بأيد انو الطب والهندسة والكمبيوتر كمان هدول لسا ياخدو اعلى لانهم تعبو لسا اكتر من الانجليزي وهاكزا .. :)
كأنو حدا مهتم لتأييدي :)
At school my english was so fluent, but after studing engineering it became weeker, but still I guess I know english.
اه .. هيك قصدك شايفين حالهم .. لأ انا أخوي مش هيك .. بالانجليزي .. بالحياه
بالنسبه للرواتب لازم نحطك وزير مالية :-) ..
طيب اللي دارس هندسه و كمبيوتر مع بعض - مثلي - قديش بطلعله
:-)
hisham :
loooooool i know that u know english :) .. 3ajbatne hai i guess ...
ah 3ade betseer be a7san el3a2elat .. :P
:: fenjan 2hwet ya hala ::
bos6ar:
شوف يا سيدي .. ازا بتخليني وزير مالية ما بتندم .. لانو مثلا .. انت دارس التنتين مع بعض .. :: لحظة تعجب انو ماشاء الله كيف قدرت :: يعني راتبك بعطيك اياه حسب تعبك .. يعني انت تعبت كتير بالدراسة وبتتعب اكيد بالشغل .. معناتها هات لنشوف ..
150 بكفو؟؟؟ :: واحد عامل حالو ما بطلع عليك وبصفر بصوت واطي ::
يعني من بعض الضمان من بعد الي ما بعرف شو بيصفو 135.. شو بوفي معك؟؟ والله انا يا اخي ما بيوفي معي اكتر من هيك بخسر .. راس مالو راتبك عندي 150 بخسر بعدين .. بمزح :)
لا والله انا بالنسبة الي صحيح الانسان بنقاس بمقدار جهدو .. بس كمان الدراسة بتلعب دور صح؟؟ فليش بدرسونا مواد صعبة ازا شغلها مو صعب؟؟
ياسيدي الله يوفقك يا رب .. احكيلي كم بدك ما بنختلف :)
دواوين الله وكيلك انا ما بسكت :)
'3reeb enu ma 3m yfta7 m3aki !!
3ad 7abeh ennek tekra2i my new post that I published in 4-september !!! lol ..
ok ,, enshalla byfta7 2reeban
razan:
ma kan yefta7 m3e ur blog and life's blog hala2 nos ele bel blogroll ma 3am yefta7o ... ma ba3raf sho elmoshkele .. m3 ene 7awalet afoot mn 3nd mnoshe ma zaba6 .. yemken el moshkele mn my PC ... bas wala yhemek ana 7a6la3 3nd 5ale to read it :P
:: wa7ad bejahez 7alo fe bye hal2 : ::
بما اني مش بل كلينتون و انجليزياتي سكر خفيف فأكيد الكتابة بالعربي افضل :)
na3ori:
ههههههههههههههههه بيل مين؟؟ شو جاب سيرتو هاد؟؟ هههههههههه الكتابة بالعربي افضل صح .. وخصوصا للي ما بعرف كتير انجليزي .. خلص ما في داعي يكتب بالانجليزي ..
اهلا وسهلا مان من زمان ما شرفتنا بزيارة :)
:: فنجان قهوة وشكلاتة لحلا .. هاتها عنا شي يوم ::
بتعرفي.. يا امّا ذاكرتي مؤقتة زيادة عن اللزوم صايرة..
يا امّا.. انا انجنيت..
لأنو انا كل فكري اني حطيت كومنت.. بس هلأ مش متأكدة ... :)
ما علينا.. انا مع قباني انو العلامات أبدا مش مقياس..
انا شخصيا بحس حالي بعبر احسن بالأنجلش.. لأنو شغلي و دراستي و الناس اللي بشتغل نعهم كللو انجلش انجلش..
فأظن اننو الكبسة اللي بترجعني عربي (خربت) :)
life:
انا ما بتخيل اصير هيك .. يعني انا بحب اللغة هاي كتير من وانا بالمدرسة بالتامن .. بس مع ذلك انا ما بدي اني اتحول عنها مع اني بكرا بمجال العمل انا عارفة حتتغير الامور .. بس فعلا زي ما حكيتي الشغل بيجبر الواحد .. انتي شو درستي؟؟
وبعدين انا يا حياة ما بعرف شو مال البلوج عندك مو راضي يفتح عندي .. انت ورزان .. واليوم كلهم ما فتحو وبالموت لفتح الي الي .. مانعيني افوت ولكم ..؟؟
كل عام وانت بألف خير يا حياة
:: وردة وتمرة وشوكو ::
والله يا براء ضغط شغل رهيب جداً و ما عم بخلص ، ماهو احنا كشركة طيران الهاي سيزون عندنا هو شهر 7 و 8
خلص وعد لما بدي اطلع انا و ام حلا زيارة و مش عارفين وين بدنا نترك حلا بدك اجيبلك اياها :)
na3ori:
اسمع!! بصدق هلا .. عنجد جيبلي اياها لما بدكم تطلعو ... هوايتي الاطفال ومو اي اطفال.. الحلوين والكتاكيت متلها .. ماشاء الله عليها يعني الله يحميها جد ..
ويعطيك العافية فعلا الطيران شغلهم بهاد الوقت .. والله الحال من بعضو الشغل لراسي انا التانية ..
:: تزكرة سفر ريلاكسيشن بس الطيارة عليك والاقامة عليك والفيزا عليك والطلعات عليك ما بعرف شو الي علينا::
Post a Comment