من هنا وهناك

بعتذر كتير على هالغيبة .. لكن والله مشغولة ومعجوئة للسما ... وما كان معي وقت اني اكتب + ما كان جاي على بالي اني اكتب كلمة وحدة .. من الضغط الي انا فيه ..

على كل حال .. انا من النوع الي ما بيسهر كتير .. بس بالعطل بسهر بغير هيك بتحول الى جاجة وبنام بعد ادان العشا ... بس هلا لأنو الدنيا رمضان بحاول اسهر شوي اهضم البلاوي الي بكون ماكلتها .. وطبعا بحضر مسلسلات مع اني قال مو فاضية .. ما بحضر شي قبل الفطور لاني بكون بالجامعة وبعدها الشغل .. بس بعد الفطور بحضر باب الحارة ونمر بن عدوان ..

باب الحارة كلو هم شو هادا؟

المسلسل حلو كتير وابداعي .. لكن في مشكلتين رئيسيتين .. الاولى انو بمطو بالاحداث زيادة عن اللزوم يعني صار ممل .. والاحداث بتتعقد وبتصير كلها نكد ..

والتاني انو دعايات ام بي سي بتجيب الصرع والضغط والسكري والقلب .. والله يستر

بس هو مسلسل اجمالا حلو .. بس ضربت معهم اول 10 حلقات كانت روعة اما باقي الحلقات متل ما حكيت لت وعجن ...

نمر بن عدوان .. من اروع المسلسلات الي حضرتها .. مع اني انا ما بحب البدوي صراحة ما بفهم عليه وما بستمتع .. لكن والله انو قصتو حلوة كتير .. وغير هيك الممثلين مبدعين كتير ..صبا مبارك وياسر المصري والله ابدعوا ... وغير هيك احداثو سريعة يعني بحلقة ماتت العشيرة .. القصد انو مافي متمطة بالاحداث ... بس بحلقة 19 بتموت وضحا وهي ست الحريم كلهم .. وانا بحياتي ما بكيت على مسلسل .. ماشي اني بحس غصة هي برقبتي بس ما بحب ابكي .. بس هاي بكيت عليها .. لأنها روعة .. وين بدو يلاقي متلها بين الحريم؟؟ وهو اصلا وين بدنا نلاقي متلو بين الرجال؟؟يعني شخصيتو بتعجبني .. رجال قوي وقد حالو وبنفس الوقت كان اول انسان متعلم بخرج من البداية وكان غير عن افكار عشيرتو تزوج وحدة مو عدوانية رغم لساناتهم وحبها حب كبير وحكى فيها القصيد .. والمسلسل وصلي فكرة انو كان حنون وطيب وبحبها كتير .. وين في رجال بكل هاي الموصفات؟؟؟ وقتهم ما كان للنساء صوت بس وضحا قد ما كان يحبها كان مخليها الكل بالكل .. وكان عيب الرجل يبكي بينما هو بكى عليها لما تركتو وراحت لأهلها انجن ولما ماتت ,... انا متأثرة يا جماعة .. تقبل التعازي في بيت نمر بن عدوان قبل مش عارف كم ميت سنة .. لو فعلا هي كانت هيك فالله يرحمها ويرحمو ويرحم موتى المسلمين وانا لله وانا اليه راجعون ....

بعدني متأثرة ...

وبهادا اللينك في وقت ما ماتت وضحا .. وفي المسلسل كامل والله صراحة يعطيه العافية الي منزلو كامل والله اني اثلج صدري لانو انا ما عم بقدر اسهر احضرو فصرت احضرو على النت .. وهاي اللينك

http://www.youtube.com/watch?v=ohVGke0iuPA&mode=related&search=

اما الجامعة فيعني سبحان الله .. الي بكره شي من قبل ما يجربو ويكون عندو شعور هيك قابض على قلبو خلص بضل كرهانو .. يعني انا كرهت هالجامعة من قبل ما افوتها ولحد هلا كرهانيتها .. صرت سنة رابعة وانا بحاول احبها .. وبصراحة الناس الي بتعرفني شخصي بتحس بالفرق بين شخصيتي بالعطلة :: مرحة :: وشخصيتي بالجامعة :: دايما ماكلة هوا :: .. لا دكاترة متل العالم ولا اشي .. هدول دكاترة التربية الله بس يغنيني عنهم .. طلع بدرسني واحد منهم مادة حرة .. يا ربي ما اتقل دمو .. نقعد هلا نستغيب فيه وياخدلي حساناتي؟؟ اللهم اني صائم ..

وهاي كل اخباري ... وبإزن الله بحاول ما اطول عليكم لأني فعلا اشتقت لمدونتي العزيزة وجميع الزائرين

:: وردة للكل ::