مسلسل نور :)

ملاحظة: البوست طويل بس حكيت كل الي بنفسي :)

من اكتر المسلسلات الي عملت ضجة هو مسلسل نور .. الصراحة عمل ضجة اكتر من باب الحارة .. ايام باب الحارة كان كبار صغار يحضرو .. بس الكبار كانو يحبو .. ما بتلاقي اب منع بنتو او استعجل بالرواح على البيت بس عشان البنات والمرة ما يحضرو المسلسل .. ما بتلاقي ناس اطلقت من ورا راس المسلسل ... ما بتلاقي ناس بتاخد وصلات التلفزيون بوقت المسلسل .. لانو باب الحارة بكل بساطة بيحكي عن حياة اجتماعية بوضع كان في ادب واخلاق وما ببث في الناس الي بيحضرو افكار ايامنا هاي .. فالأهل لما كانو يقعدو مع ابنائهم يحضرو باب الحارة كانو يكونو متأكدين ومبسوطين انو هاي كانت الحالة الي عاشوها قبل سنين لما كانو شباب .. وبتمنو هاي الايام ترجع .. اما نور؟؟ فهو مسلسل سبب مشاكل اجتماعية رغم انو مجرد مسلسل .. والسبب؟؟ مهند

...........
مهند عمل ضجة كبيرة .. هو كبطل يعني ربنا الله مزبط الدور على داير المليم ... بس الصراحة انو هو حليوة .. والبنات منجنات عليه ..
المشكلة عم بتصفي عكس باب الحارة ...بعض اللقطات غير لائقة نهائيا للأطفال .. وللأسف في كتير اطفال بيحضرو هادا المسلسل ...

بعض المواقف الي صارت عليه :
- الاطفال من سن 3 سنوات فما فوق بيسألو عن مهند ونور وبيحضروه... حتى في شبس وخداديات اسمهم نور ومهند .. وهاي موجهة لفئة الاطفال ...

- واحد راجع من شغلو تعبان ومرتو عم بتحضر نور .. فات وسلم ما ردت حكى لا حول ولا قوة الله بالله ... فات على المطبخ يسخن الاكل ما لقاه .. حكالها يا مرة وين الاكل ؟؟؟ ما ردت ... رجع حكالها وين الاكل .. ما ردت المرة التالتة وقف قدامها وصرخ فيها حكالها من شان الله تحركي عيونك عن الزفت هالتفلزيون وتردي علي .. وين الاكل جوعان ميت جوع بكفي انك ما رديتي السلام ولا حكيتيلي كلمة حلوة .. قامت حكتلو : زيح زيح خليني اشوف هاللقطة شكلها حامية ... حكالها: خلقة شب مش عارف شو عاجبكم فيه :: كل الشباب ترا بكروهو لمهند بغارو :) :: حكتلو بالله هو خلقة وانت خلقة ؟؟؟ هادا سؤال تسألني اياه ..؟؟ حكالها وانتي طالق بالتلاتة .. وهاي قصة صارت عنجد ..

- قصة تانية ... : الاب قعد يحضر .. وبسبب بعض اللقطات طلب من بناتو ما يحضرو .. والبنات طبعا شو بقنعهم؟؟ صارو ما يحضروه على ال 10 يحضرو على الاعادة على ال5 واكتشف الاب وتشرشحو وانمنعو يحضروه .. لاقو انو بينعرض بعد ال 2 بالليل .. صارو يعملو حالهم نايمين ويصحو بعد ال 2 يحضرو .. ولما اكتشف الاب ضربهم كلهم وكسر التلفزيون ..
بعض الاباء جدا محافظين ... وانا صراحة ما بلومهم .. بس اتخيل بالاقناع كل شي بيجي احسن من إنا نمنعهم وما نشرحلهم ليه ؟؟؟
وكتير قصص الاب منع .. وهم صراحة الام بي سي نقلتو على ام بي سي 4 عشان تجيب الي بدها اياه وما حدا يحكيلها وين رايحة؟؟واساسا المسلسل متوفر بكل الاوقات ... يعني الي بشتغل او الي ما بقدر يحضرو بوقت في اوقات تانية بنعاد .. بالعربي الهنداوي ما الو حجة عمي :)

وصلنا للحدث الاهم ... عابدين الزفت .. من انذل الادوار الي بحضرها دور عابدين .. وحتى شكلو استغفر الله مش شكل ... مبين مخيف ومو مريح من البداية ... وانا من البداية ما ارتحتلو ... اساسا الي بيرجع بيتزكر لما التقى بنور كيف كانت حركاتو بيعرف انو هادا نيتو مو شريفة ....
وباقي البنات .. جايبينلي عارضات ازياء يمثلو .. كلهم نحاف بصورة رهيبة وطوال ما بعرف من وين جايبينلي الطول وعندهم درجة حلوة من الجمال ... بيورونا انو الاتراك كتير حلوين ... اي الختيارة الي هي الختيارة شريفة حلوة ومرتبة .... هاي بالتأكيد فئة صغيرة من مجتمعهم .. والشي الي بيقهر انو ما بتروح الا على الصبايا البسيطات .. بصيرو الشباب بدهم الفئة البسيطة هاي وباقي ما باقي ما بيعجبهم ... يجعلهم ما تزوجو .. اخريتو الواحد لو اجى النصيب يتزوج وحدة ولا بتنطبق عليها نصف مواصفاتو ..
اما مسلسل سنوات الضياع فأنا مو من عشاقو .. الصراحة انو انا ما بحب اللف والدوران الزايد الي فيه .. وبمطو بالاحداث بصورة خرافية .. عم بيضعيو قصتو ..

بالمناسبة: عابدين لازم يموت ... اساسا انا سمعت انو بيموت ما بعرف ازا بيعيش .. ازا عاش بيكون نعي كازب :: :)
مع تحيات الناقدة الكبيرة سويت لايك اروز :)