Tuesday, April 3, 2007

من صباحية ربنا؟؟











راح اكتب هذا البوست بلغة عامة .... لانو ما بنفع ينكتب غير هيك ...
شو هو الحب؟؟
شو معنى انو الانسان يتعذب بحياتو عشان انسان تاني ؟؟؟
ليه نخلي حياتنا تعتمد على مشاعر انسان يمكن يكون صادق ويمكن يكون متلاعب؟؟
في حب غير حب الزواج ؟؟
من صباحية ربنا اجاني تلفون ... كانت وحدة من اعز البنات عندي .. وصديقة عزيزة كتير على قلبي ... البنت عم بتبكي... شوفي ولك شو مالك؟؟؟ صاحبها تركها ...
مو هون المشكلة المشكلة انهم بيحبو بعض ( على اساس بحبها ) .... والبنت حالتها حاله .... معظم صديقاتي الي بعرفهم بيصير معهم نفس الشي ... وهات يا بكى ونواح ... وين المشكلة؟؟ شو المشكلة مو قادرة اعرف ... انا خبرتي بهالموضوع مو كبيرة ...بعرف من هاي ومن هاي ... بسمع هاي عم بتبكي وهاي عم تلطم وهاي مش عارفة شو ...
شو يعني ؟؟ صراحة انا بعرف كل البنات الي اجوني كانو مخلصات .... نادر ما تلاقي الاخلاص هالايام ... عملة نادرة .. هادا اذا كان في اخلاص ... والمشكلة احيانا بتكون مشكلتك الرئيسية الاخلاص..
يعني انا بحس انو احنا بزمن خلص ... الفضيلة صارت بتسبب مشكلة لاصحابها ... الصادق باكل هوا والكزاب بعيش ... الوفي بينضحك عليه والمنافق مين بيقدرلو ... ويمكن صدق الانسان واخلاصو يسببولو مشكلة مع حالو مو مع حدا تاني ... يعني يعاني وحالتو حالة لانو هو مخلص وغيرو بتلاعب فيه ...
يعني الشباب غلط والبنات غلط طيب على مين الحق بالزبط؟؟ مش فاهمة ....
بدأت اتأكد انو الحب ممكن يكون ولا شي من غير ارتباط ...وحتى الارتباط هالايام صار بخوف ... بس في ناس بيحبو من قلبهم وبالنهاية مو لبعض ... طيب ليه من البداية شفنا حالنا مو مناسبين لبعض .... واهالينا ما بيرضو فينا .. ليه نكمل ... ليه ما ندرس الحب قبل ما نمشي فيه ... ليه دايما بنخلي مكان لكلمة " لكن" تحشر حالها بالوسط بينا ... مين احسن : اجي على حالي هلا وانا ما بعرف هالانسان/ الانسانة ولا اكل هوا بالاخير وما نطلع لبعض ... في البداية كل شي اسهل ... بالنهاية ما بيجي الا العزاب ووجع الراس ... والشكل مو مهم ... المهم التنين يكونو مرتاحين مع بعض .... ليه ما عنا تخطيط بحياتنا ويكون صح ... ليه ما يدرسو الحب في المدارس ... بما انها تربية وتعليم ... ليه ما يعرفوهم الاسس الصح للحب واختيار شريك الحياة... بتقولو بنخرب الطالب ؟؟؟ كتير اسفة احكي انو الطالب من الصف الثالث ببدا عندو الخرب سواء بمدارسنا الحكومية او حتى بالخاصة .... ومافي غلط يتعلمو لما يكبرو شوي شو هي الاسس الي بيختارو فيها شريك الحياة ... يا جماعة خليها مادة اجبارية بالجامعات .. على اساس انو الجامعات يعني اعقل من المدارس واكبر وبيفهمو .... علمو الناس الحب بتخففو من مشاكل كتيرة ... البنت بتعرف شو الها وشو عليها والشاب بيعرف كيف يختار ومين يختار ( الفكرة ممكن تكون جنونية بس الها معنى ) ملينننننننننننا من الي بيبكو لانهم مو لبعض ... والي بيوقفو بوجه اهلهم لانهم بدهم بعض وبالاخير بيندمو ... نفسي امحي من قاموس التاريخ الانساني كم كلمة : خيانة غدر استغلال كزب لف ودوران ( كلمة مركبة ) دموع حزن بكى خوف قهر ... للاسف حتى كلمة حب احيانا بيجي على بالي الغيها ...
بحس هالايام : كل هاي الكلمات هي تعريف الحب ... ما عم بشوف قصة حب رومانسية بتستمر ... كل البنات بدهم تكون قصصهم روميو اند جولييت .. يا جماعة روميو اند جوليت حبو بعض بس ما كانو لبعض .. ماتوا .. ماتوا ع جهنم الحمرا بدكم تلحقوهم؟؟ نفسي نضل صغار .... كلنا نضل صغار ما نكبر ... ما يكبر بعضنا وعندو قلب قاسي ... يا الهي ما اكتر القلوب القاسية بهالزمن ...






ياطفل لاتكبر .. كذا أجمل كذا أطه
كذا لاهم يتراكم .. كذا لاظغط لاسكر
ترا أكبر كذبه عشناها

يا الله متى نكبر ؟؟

نفسي ابكي على الكل .... لو بعرف انوو البكى حيفيدهم كان من هلا بكيت ... وحتى لو كنت انا بهالمكان ... كنت حستخسر على حالي دمعة على اطلال المحبوب ازا كان خاين وغدار


....




22 comments:

Qabbani said...

ابل ما علق على الموضوع , انتي بالعادة بتحكي بسرعة صح ؟

يلي عم تحكي في حول و جميل , الحب ما اله تعريف , ها اول شي , ويلي بجب بده يعرف الحب بعرفه من مفهمومه الشخص , للأن ما حدا بإدر يجزم شو هوه الحب , و يلي عندو خبر صافي يا ريت يخبرني , لأنه انا من الناس عندو قناعة انه الحب شعور شخصي جدا , و اله اساس ما بجب من فراغ, يلي بصير مع البنات متل ما حكيتي اكتي منن بدن قصة حب و عاشق و معشوق , بس بتنصدمي بالنهاية انه ما بإدرو يكملو مع بعض , او أهلو مو موافقين ؟؟ طيب ليه , ما بتعرف اهلك مثلا عنصرين او غيرو , و يلي إلك انه الأهل ما دخلهم هاد اجدب , لأنه بالإرتباط عم تربطي عليلتين ببعض مو بس نفسين ,

اخلاص يمكن البات اصدق من الشباب في لأنه مشاعر بتحكمهن اكتر , الشباب بخافو من الإرتباط و الإلتزام ,بحب يضل عصفور طيار , يعني ماحدا رابطه بشي ,

الفترة الأخيرة صار الحب ما بيعرف عمر يعني عندك من 15 سنة ببلشو يحبو بعض , طيب شو مشان 15 سنة ؟؟ ايه انا ما باخد بحكي انسان اذا كان عمره اقل من18 او حتى 20 كمان, لك صبايا عمرن فوق ال 24 سنة و لسة ما بيعرفو يتخدو قرار و شباب عم توصل ل 30 و هي لسة عم تفوت بالحيط , ايه شو يعني بده يعرف اختار شريكة حياتو و هوة 20 سنة و هي 16-17 هدا اسمه عفوا علاك و حكي فاضي ...

مع احترامي للجميع و لكل الأحاسيس يلي بتحس فيها بس المجتمع صاير صعب , و فهمه اصعب , بنات عم تهري حالها و تخرب الوبها و هي لسة صغيرة ,

يعني معأول بنت عمرها 20 سنة مكسور البها 3-4 مرات و بتألك اااااااااه من ألبها ,

هاد دليل انه مفهوم الحب ضايع

و مخلوط بين , الأهتمام , الراحة النفسية , العقل الجميل, الحنان, الكلام الحلو ,
لو كنت بالشارع و اجيت لعند وحدة اطلعت بعيونها مباشرة و عطيتها وردة جورية حمرا و التلها هاي الك يا حلوة مع ابتسامه ,
و بطلت اتشوفني , بتحداكي اذا ما صارت اتفكر اكتير و تحكي هاد الشب بحبني , مع اني عم بتخوت عليها .,...

خلص بحكي لخبص بالحكي اكتر بس دائما بإولو

قصة حب انتهت بالزواج ,
لاحظو انتهت , كيف يعني؟ بعد الزواج ببلش حب من نوع اخر و ببلش الشغل الصح

صباحك سكر , بالتوفيق بإمتحاناتك

Anonymous said...

اهلا موفق
صباح النور
بالنسبة للحكي السريع ... كيف عرفت؟؟ انا بحس حالي احيانا برامة درجة اولى واحيانا ما بفتح تمي بتعليق ... حسب الموضوع يعني..
بس يا موفق شي بيقهر ... يعني الموضوع كلو على بعضو متل ما انت حكيت بيقهر ... بتلاقيها عمرها 12 سنة وبتبكي ... ليه يا حبيبتي بتبكي شو صار؟؟ اخدو منك الشكلاته؟؟ لا ما اخدو الشكلاتة بس كزب حبيبي علي ...حبيبي؟؟؟
يعني انا اليوم الصبح صراحة احكيلك حسيت انو الدنيا بتلف فيني مو عارفة شو اعمل.. الومها الومو الوم حالي الي رديت عليها؟؟
ومعك حق بكل كلمة حكيتها ... الحب بدو ناس ناضجة لحتى نعرف نعرفو صح ... بدو ناس واعية وعارفة انو مو كل كلمة بيحكيها الشب طالعة من قلبو وانو نهاية اي علاقة مو صحيحة هو التعب ... والحب تجربة شخصية
احنا شعب ما تعلمنا التخطيط بحياتنا يا موفق ... شعب ضايع ... اخ لو انا وزيرة التربية والتعليم ... كان غيرت المناهج كلها ... حتى الرياضيات بغيرها وبخليها كيف تحسب لحياتك صح..
شكرا الك كتير

Anonymous said...

ول ول ول ول ... شو كل هالحكي... طولي بالك يا ستي مش هيك
البكي جزء من التجربة.. يعني حب بلا لوعة ما الو طعم و لا حشيش
مرات الناس بتخلص، و مرات بتتسلى.. و مرات التنين بيتسلوا.. كل واحد على طريقته
يا ستي هاد البنات في بلادنا ما بدهم يحكو مع واحد الا اذا بيورجيهم خاتم الزواج، لا صداقة و لا حشيش.. فالشباب تأقلموا و صاروا يلوحوا بالخاتم من بعيد.. بس علشان يقدروا يقربوا شوي
المهم .. النتيجة ما بيصير نصيب و بتقلب جوح و نوح و لطم

لعلمك الشغلة مو سهلة على الطرفين انهم يتركو بعض.. بس زي ما قالو من قبل... ما حد بيموت من الحب.. و ما حد بيموت من قلب مكسور.. و قولي لصاحبتك.. تعيشي و تاكلي غيرها

Anonymous said...

قويدر:
اهلا اهلا ...
معلش انا بالنسبة الي الموضوع كان معصبني .. يا اخي مليت كل شوي حدا يشكيلي من الحب ... اشتهيت شي حب من غير شكوا ... انا معاك انو لازم يكون في مواقف متعبة عشان يبين فيها الحب ... بس مو معقول كل المواقف متعبة .. يعني يوم لك ويوم عليك .. يا سيدي موافقين يوم الك وعشرة عليك بس خليه يجي هاليوم الي الك ... هدول ما عندهم غير عشرة عليك وعشرة عليك ... فعلا احنا البنات وبمجتمعنا ازا ما كان في ارتباط ما بنستجري نحكي ... والشباب بيستخدمو الارتباط لانهم دارسين الوضع وعارفين شو البنات بيحبو يسمعو وشو ما بيحبو ..
هههههههههه تعيشي وتاكلي غيرها؟؟؟
والله بتعيش وبتاكلني ازا بحكيلها هيك ...

Anonymous said...

bte3rafi ? Ana zah2aneh hal2osas ..w 2refet min halmawdee3 elly 3m betseer ma3 kol elnas la2anno fi nas ma bet7es w bet7eb tel3ab fi masha3er elnas eltanyeen.

طيب ما دام عم بكتب عربي ليه عم بكتبوا في الانجليزي ؟ جد اني مفصومه :) المهم بس بدي أحكي انه كلام موفق صحيح ، انه مفهوم الحب بيختلط عن الناس بمفاهيم تانية وهاد بخليهم ياخدوا قرارات خطأ وبتوصل لمكان خطأ

An Oriental Blog said...

يا عمي بلا حب بلا وجع راس. مش فاهمة ليش الناس مستعجلة تحب و تعشق. و الله كل شي بوقتة حلو.
و بتمنى من الإخوة الحبيبة, انهم لما يختاروا بعض, يختاروا صح زي ما قلتي يا براء. عشان يبنوا علاقة على أسس صح و يكون إلها هدف و يختصروا على حالهم نكد و دراما. علما إنو في ناس بتدور دوارة عل الدراما و بدخلوا عمدا في هيك علاقات. مفكرين حالهم بفيلم عربي. الحب الصح بييجي بوقتو, و أول ما يشوفو الواحد بعرفه على طول.

Anonymous said...

7ala:
اهلا حلا
معك حق بكل كلمة حكيتها .. كل هالقصص نكد وسمت بدن وحكي فاضي ... بطلتي تسمعي شي غير المشاكل والهموم ... والنكد طبعا...
وعلى سيرة مفصومة ما تخافي كلنا مفاصيم
واهلا وسهلا فيكي

an orintal blog:
اهلا يختي ... اكيد انتي مابتقصديني بشي؟؟
هههههههههههه بمزح...
اكيد ديمة .. انا الكلام هادا بحكيه كتير (( بس لو في حدا بسمعني انا ))
:)
فعلا لو كل واحد عرف الي الو والي عليه ما بيصير هيك ... والناس بتحب تعيش الدراما وانتي فاهمة علي كيف يعني ... في ناس وللاسف احكيلك انو مستوياتهم تحت كتير ... وفي ناس جاهلة ... وفي ناس وفي ناس ... انا عارفة :)

Anonymous said...

Tayeb ma3lesh ana afta7 temmi o atfalsaf shwai Kaman :)
Had shoosi ya setii, el wa7deh lama tetnayal 3ala 3ean ahelhao t7eb, ma betkoon 3arfehe enha 3emlat e5teyar ‘3alat, b 3eanha bakoon a7san wa7ad be edenya, o howa o bs o ba7ebbo ya baba o elkalam el faret had.
Bet2ooom lama yetreko ba3ad betkrah kol el shabab, o mosta7eel sa7eb marra tanyeh,o ana keef ra7 a2dar ansah, o mesh a3raf a3eesh mn ‘3earoh, o ana, o ana salan sho elli 5alani a7ebbo mn el awal.. o ma ela a5erehe mnel ta5bees elli bte3rafeeh.
Shwai wella eh “t3arafet 3ala shab amman sho, jad enno kteer amoor o 7abbab o blah blah blah” tayeb good for you
Ya3ni bel mo5tasar, wala fi 7ob wala batee5, o 7atta law fakarat 7alha bet7eb, it’s ok, 5aleeha, bs aham shi balash el osas elli mesh waqe3eyeh…
7otti fi balek 5at el raj3a, ana ma ba2ool ma t7ebeeh la el shab wella tshokki b kol el 3alam o etal3i 3eani l2nnek 8atta fi balek enno ma ra7 tezbot!! Bel 3ax, do you best, a3ti mn albek, bs eza ma sar naseeb… ya jama3a heak el denya.. 3adi, ma entaha el 3alam, da5alto tajrobeh ella ma tkoono t3almto menha.. hadi la7alha betkaffi …
ya waradi sho 7akeat LOOOOOOOOOOOOOL
thanks bara2 ;)

Mala2e6 said...

براء
واضح جدا و بدون ما تقولي انك لسه براء من الحب

المشكلة انه في خلط بين الحب و مشاعر تانية

الحب ما بتدرس بمدارس و الحب ما بتقدري تختاريه او ترفضية

فرق بين الحب و الزواج
ممكن تردسي في المدارس الزواج كحالة اجتماعية
بس ما بتقدري تعلمي الناس كيف يحبوا

مجموعة من الهرمونات يتختلط و بتلخبط راس البنت و الشاب

صاحبتك اللي بتبكي هلا كمان يومين بتلاقيها نسيت و بتضحك

بعد ما تكون قلبت راسك بالبكاء و اللطم

الموضوع يا براء معقد و متشابك و اله اكتر من زاوية و اكتر من مفهوم و مع كل مرحلة عمرية بتغير مفهومه و بتتغير نظرتك اله

هلا بنات اللي عمرهم 15 و 16 و بتقولك بتحب.. بالانجليزي اسمه بابي لاف

اه من بابي يعني جرو

puppy love

ليش؟ لانه بشبه تعلقك و حبك لبابي زغير.

مش قصدي اشي عن الشباب طبعا..نو اوفنس

puppy love is a crush...crush is not love

لما مريض ينام بالمستشفى و تهتم فية ممرضة او دكتورة و هو في حالة ضعف بيحبها
او بفكر انه بحبها

اختلاط بالمشاعر

الاعجاب غير الحب

الشاب كمان بس تتركه البنت طبعا بتنقح عليه كرامته

و بيصير ينجن و يفكر كيف يسترجعها

لانه بحبها

هوة هيك بيفكر

بس لو رجعتلة بتركها

لانه بكون اخد بتار كرامته

الحكي كتير و ما بدي اوجعلك راسك بس النتيجة يا براء

لما تطبي على بوزك لازم تتأكدي انه حب

قبل ما تبكي عليه

الحب بعد دراسة مستفيضة عمرة الافتراضي 3 سنين و نص
هادا اذا كان حب قوي متين مش ابو الشلن اللي بيعمر اسبوع


و بعدها بيطير

هاي دراسة مش من عندي

Anonymous said...

Mayoosh:
Bte3rafe?? 7asa 7ale bsm3ha w ana 3m ba2ra ele ente katebteh ..
" Bet2ooom lama yetreko ba3ad betkrah kol el shabab, o mosta7eel sa7eb marra tanyeh,o ana keef ra7 a2dar ansah, o mesh a3raf a3eesh mn ‘3earoh, o ana, o ana salan sho elli 5alani a7ebbo mn el awal" .. as if u were there …
W besara7a .. ente 7kete kol she sa7 w ma5aletele a3le2 3la she :P
Bs hai elmsha3er ana nfsi afhamha… y3ne leh elwa7da btez3al w btedaya2 lma yntahe el7ob ???leh btebd2 t7ke hek???fe sabab 3'er eno ymken el7ob ykon qowe 5afeya msta7el el2ensan ysay6er 3leha?

Anonymous said...

ملائط:
والله ياملائط انا بعرف بنات وعمرهم 11 سنة بلشو يحبو ... وفي منهم اكبر بسنة تنيتن خطبو هلا الي بيحبوهم ... شكلو حب الطفولة ابرء وأدوم؟
وفي فرق بين الحب والاعجاب ... فعلا فرق كبير وواضح ... بس زي ما حكيتي بتختلط معاكي الامور ... احكيلك قصة بضل اتزكرها دايما كل ما اسمع سيرة الاعجاب وهي صارت فيني ..
انا لما كنت بالصف الثامن .. الثامن ها ديري بالك يعني كان عمري 13 عجبني شاب من هدول الي بيوقفو على بواب المدرسة (هههههههههههه) عنجد كان حلو واحلى شاب بين الشباب ... طبعا انا نظرا لتربايتي حاولت اتجاهل الموضوع تماما ... بس الشاب انتبه ... وكمان طنشت .. حسيت حالي بقدر اسيطر على الوضع والشاب ما همني ابدا .. يعني يمكن ضليت افكر انو منيح لبعد سنتين .. مع العلم اني رفضت تماما اني احكيه معاه .. خوف على دين على عادات على كل شي ... بعد السنتين سمعت عن قصة كنت دايما اسمعها بس ما افكر فيها .. وفجأة لما فكرت فيها والله ما اخدت معي ثواني ... حسيت اني بكرهو .. يعني الشاب شكل مو اكتر .. وكان اعجابي بالشكل مو اكتر .. بس الشاب من جوا كان كتير سوري احكي انو بوبي تاعك هادا ههههههههه... وانتهت القصة بثانية واعرفت انو مو كل واحد حلو يعني منيح .. درس حلو وسهل وبسيط ... هلا بالجامعة .. انا سنة تالتة مستحيل اصلا اطلع على واحد... قناعتي بتحكيلي عيني ما حتجيب الا المشاكل وخليني تقليدية متل ما بيحكولي على قد ما شفت :)عملتلك بوست تاني :)

7usam said...

No women No cry

Anonymous said...

7usam:
wade7le eyaha .. i don't get it ... slamtak el lanba btedwe 3nde met25er .. fe 3'ala6 bel2emdadat...:P

7usam said...

bara2
ya3ni eno albanat asas al mashakel
be7'alo elshabab y7bohom ba3des beser zay ma enti katbeh

ba3deen e3mali zayye 3'ayri el laamba
rakbi neon a7la :D



mosh kol albanat

Anonymous said...

7usam:
i will change it bs moshkelte eno elkahraba ma26o3a....:P
w 7aram 3lek ebanat al6af elka2enat lesh bdhom ykono sabb elnashakel ?? w 7ata walaw kano ento ma bte2daro t3esho mn 3'er mshaklena ele btethbeto feha enk 2badayat:P

Anonymous said...

بتفق مع الناس يلي بتحكي انه صعب الواحد يعرف الحب ، يعني جرب اسأل اي واحد بحب و غرقان لشوشتو انو شو يعني حب ؟؟ مش راح يقدر يجاوبك و لو حاول يجاوبك مش راح يقنعك

بتذكر كانوا دايماً يحكولي (اولاد عمي الزعران) انه تعرف على اكثر من بنت و اطلع و لف و دوور و حب هاي و حب هديك عشان يصير عندك خبرة في التعامل مع الجنس اللطيف (مع انه في منهم بينها و بين اللطافة بلاد) ، و بالنهاية بصفي مارق عليك كثير مواقف مع كثير بنوتات بعقليات مختلفة و على هالاساس بتقدر تحدد انت شو بدك و مين الانسب لتكون شريكة حياتك ، بس انا عملت فيهم العكس اول وحدة شفتها و حكيت معها تزوجتها ، طبعاً مش هيك خبط لزق يعني سولفنا مع بعض شي سنة و نص و تخلل هذه الفترة طوش ، هوش ، ضحك ، انبساط ، حب و بعد هيك خطبة 85 يوم بالزبط ( لانه الخطبة الطويلة بتجيب حكي نساوين الو اول ما الو آخر ) و بعديها عاد انهبلت و عملتها ( و الفساد الله بحطوا بالنار )

بالنهاية الحب بنظري بدون وجود نية للارتباط عبارة عن علاك مصدي و ما منه فايدة غير انو بجيبلك ضغط و قلب و سكري ، و برأيي انو الشباب على علاتهم و مواقفهم البايخة مع البنات بس بضلوا الافضل ، يا اخي بكفي انو قلبهم ابيض و بسيطين جداً و على عقدهم بس ما عندهم تعقيدات البنات ، و بعدين مساكين و بنرضى بسرعة بس انتو مع احترامي ( و ما حدا يمد ايده لو سمحتو ) لما تزعلوا بتقلبوا يهود خيبر ولا يمكن ترضوا من كلمة ، و بتضحكوا علينا بدمعة وحدة فقط لا غير او مثلاً عن طريق اختراع قصة من قصصكم و اشهرها انو ازا ما بدك نخطب انا في ناس جايين يشوفوني الاسبوع الجاي

بيحبوا بعض و بزعلوا من بعض على موضوع الارتباط و بتولع بينهم و بردوا برجعوا يجاملوا بعض و يضحكوا على بعض بالحكي و كل واحد منهم متأكد انو الموضوع مش راح يمشي مثل ما بدهم و بالآخر لما يصير انفصال كامل و يبعدوا عن بعض ببلش النواح ، حوا وفري على حالك النواح يختي و قدري الامور منيح انتي بالنسبة بلا مؤاخذة الموضوع اسهل عليكي نسبياً من الشاب اما يلي بقهرني هو الشاب يلي بدو يتزوج و مافي بجيتوا ملييييم احمر قال ليش بس لنه بحب فلانة و بقلك انوا ربنا بسهل الجيزة ماشي على عيني و راسي بس برضوا الناس بتقلك اعقل و توكل اما مش بس تتوكل و مكانك سر

الله يهدي الشباب و الشابات و يرزقهم و يخليهم قادرين انهم يرتبطوا بدل ما تضل القصة بس حب و هم و غم و نكد و لترات من الدموع

Anonymous said...

طيب اسمحيلي يا براء اعلق ولو انو تعليقي متأخر شوي...
مش كل الناس بحبوا متل بعض، و لا كل الناس بعرفوا يميزوا ازا اللي عم يحسوا فيو حب ولا اعجاب ولا أي اشي تاني...
بس يللي أنا متأكدة منو انو الانسان الايجابي بحياتو اجمالاً رح يكون ايجابي ختى في الحب. ازا الانسان كان عندو ايمان بالله سبحانه و تعالى و بالنصيب، و كان عقلاني و متزن، بيقدر يتصرف بكل المواقف اللي ممكن ينحط فيها... يعني لو حب حدا رح يخلص... و لو الطرف التاني صدّو رح ياخد الموضوع بمنطق و رح يكون عارف انو الحب بالذات مش بالغصب... و اصلاً مش رح يصارح الطرف التاني بالموضوع لحتى يدرسو و يتأكد انو عالأقل من ناحيتو مافي معوقات... و لما يدخل في علاقة رح يتحمل مسؤولية تصرفاتو كاملة و ما رح يحط كل اللوم عالطرف التاني عند أول مشكلة... و رح يوقف بوجه العالم كلّو مشان يدافع عن الحبّ اللي بقلبو...
و بعدين في شغلة نحنا هون مش عم نفهمها... اللي نحنا عم نمارسو عأساس انو حب هو مش أكتر من انانيّة، الحب مبني عالعطاء مش عالأخد.. يعني لما شب بحب بنت مفروض يكون كل اهتمامو سعادتها و راحتها، و العكس طبعاً صحيح... مش يحبها مشان تحبّو... هاد بيسمّوه الاجانب "الحب غير المشروط" (unconditional love)
بتحب بدون أنانية، و بدون ما تستنى مقابل... و مشان أوضح هاي النقطة بالذات خليني اشرحها بمثال زغير: لو في بنت اسمها مريم معها لعبة باربي، و بنت اسمها روان معها طابة، و اجت مريم هجمت على روان اخدت الطابة، و روان ردت الهجوم و أخدت الباربي من مريم، رح يتبادلوا الالعاب بس و هم التنتين متدايقين من بعض و مكشرين بوجه بعض... بس لو مريم أعطت الباربي لروان لحالها، و روان اعطت الطابة لمريم، برضو تبادلوا الالعاب بس و هم مبسوطين و رضيانين من بعض، و رح يضلو يتفرجوا ببعض و يضحكوا... ما تضحكو عالمثال loooooooool بليز حاولوا تفهموا العبرة منّو...
و بعدين نحنا بالشرق الاوسط عنا مفاهيم غلط... يعني وصمة "عانس" اللي بلزقها المجتمع على جبين أي بنت بتكبر بلا زواج بتضعف موقف البنت كتييييير، و بتخليها دايماً ترضى بأقل القليل لأنو أحسن من ولا اشي... لأ ستي، غلطانة... " ولا اشي" كتير أهون من انِّك تاخدي واحد ما بتحبيه و لا معبي عينك لأنك خايفة ما تتجوزي... الزواج نصيب من عند الله، و ازا الك نصيب رح يجيكي لحد عندك...
و آسفة مشان الغرغرة الزيادة
hehe
Bara2 send me on grn_gables@yahoo.com please... :-)
waiting for you...

Anonymous said...

ناعوري:
علشان اكون صريحة معاك .. قرأت التعليق مرة ومرتين وتلات علشان ما افهم اي شي غلط ... وصراحة في كتير نقاط معاك حق فيها بس في كمان نقاط اتهامات اتهامات لإلنا ... شوف احكيلك يعني بأيدك بأنو العلاقة الي ما فيها ارتباط مو علاقة صحية ولا صحيحة لكن في ناس ما بهمهم مشاعر الاخرين ... هاي مشكلتنا احنا البنات بنخاف من اي علاقة ما بتيجي فيها سيرة الزواج ... لانو يا ناعوري المشكلة انو بتكون في مشاعر ورغبات كامنة بالانسانة ما بيقدر يرضيها الا بالزواج ... فيعني متل ما الشاب بدو يتزوج البنت الي بيحبها البنت كمان بدها تتزوج الشاب الي بتحبو عشان هيك هي بتحب اسرع من الشاب فبتبدأ ايش ؟؟ تحكيلك عن الزواج ... وبعدين احنا بمجتمع وما بنقدر ننكر هالشي كتير بنهتم بصورة البنت عشان هيك البنت دايما خايفة على حالها .. من رأيي الي بخاف على حالو ما يعمل شي غلط ...
وبالنسبة للكزبة .. كاشفينها يعني ؟؟
لكان خلص بنا نخلي الصبايا يألفو كزبة تانية عشان نضل مسيطرين على الوضع..
وموضوع الحب متل ما حكيت مستحيل انا افوت فيه لاني انا بعرف انو مجموعة احاسيس وقوة خفية بتسيطر على الانسان .. بس مع ذلك بستغرب منو ...

واهلا وسهلا فيك :)

Anonymous said...

نيرات:
اولا شي اهلا وسهلا فيكي وبالتأكيد بتقدري تعلقي .. بيتك التاني ولو :)
وتاني شي انتي انسانة راكزة ورايقة وهادا الشي الي افهمتو من التعليق ... مو كل الناس فهمانة متلك يا نيرات .. كلامك اكتير من 1000% مزبوط بس هاتي مين يطبق ... ليه الواحد ما يدرس كل شي قبل ما يفوت بالعلاقة فعلا لانها بالنهاية حتوقع على راسو ..
وكلمة عانس؟؟ بكرهها .. زي ما حكيتي عانس اهون من ماكلة هوا وساكتة .. والي بدار اهلو على مهلو ..
اهلا وسهلا فيكي نورتي :)

Anonymous said...

اهلاً فيكي ، النا الشرف والله نكتب عندك

Anonymous said...

للأسف انو مجتمعنا بالفعل مصعب المهمة على البنت مثل ما حكيتي و المشكلة الاكبر انو الكل بصيرو يدخلوا بحياتها و هذا الاشي بكركبها و بخليها دايماً خايفة انها تضل من غير زواج

و بالنسبة للقصة يا ستي نعم كاشفينها ، العبوا غيرها خلينا نشوف بنقدر نحزر ولا لأ :p

Anonymous said...

na3ori:
watchout .. ان كيدهن عظيم:)