اليوم مبين من اولو

update :: يالله شو شوووووووووووووووووووووووووووووووووووووووووب

انا انطردت من المحاضرة يا ناس ... فوق ما هو صيفي وانا مو طايقتو وفوق ما انا صاحية بدري ومو سهرانة وفوق وتحت وفوق وتحت ..ويمين وشمال .. المهم انطردت
المشكلة وين ؟؟ انا لما صحيت اصحيت غصب عني ... بس خلصت لبس وكل شي متل البنات الشاطرين يعني متل الفتى النظيف مهذب لطيف اقوم بالصباح اسعى الى الفلاح فأغسل اليدين والوجه والرجلين والبس الثياب واحمل الكتاب واسير نحو العلم بهمة وعزم .. مو قضيتنا المهم بعد ما خلصت لبس ولا هو اوبس ما في مفتاح .. ماما وبابا طالعين كل واحد بجهة والباب مسكر والمفتاح مافي وعشان يكمل الفلم الهندي المكسيكي الاردني الجامعي البرائي ما بعرف وين حاطة النسخة تاعتي ... وعلى كل حال مافي وقت ابحث عنو :: حلوة ابحث فجأة كلمة ما دخلها بالعامية :: المهم اتصلت مع بابا ولحتى اجى وفتح الباب وكل شي كان رايح نص ساعة يعني حوصل متأخرة حوصل متأخرة ومع ذلك طلعت تحت اشعة الشمس الحارقة وانتظرت طويلا طويلا ليأتي التكسي لاخرج الي الجامعة وبعد طول انتظار طل الاصفر على بداية الشارع كنت سأعلن الاعراس في جميع انحاء المملكة واوزع المناسف ... بس انا ما خفت اخسر فلوس لا لا انا خفت الناس ما يعجبهم الطبيخ فحكيت شو بدي بوجعة هالراس بوزع ملبس المهم لما قرب التكسي ولا هو في حدا ... كادت الدموع تنهمر بسرعة البرق على وجنتي الحمراوتين :: مو من الجمال بس انسطحت من الشمس :: المهم بس ربنا كبير وبيعرف اني مظلومة فجأة اجى تكسي اخر ... حكيتلو طير على الجامعة طيران البرق .. أبى واستكبر ... ولكنه شاف أديش انا حزينة ومعترة فأسرع ولكن المفاجأة كانت حادث بالطريق فبدل ما ياخد الطريق 10 دقائق اخد 20 ويا حظي ويا هناي ... وصلت متأخرة وبعيد عنكم رباط البوت بضل يفلت وبضل اوقف اربطو بالاخير حكيتلو حل عني عمو مستعجلة انا,... وعندما وصلت الى الاطلال ... وبكيت المحبوبة وتنهدت فتحت الباب واذ به الدكتور بيأشر بإيدو انو لبرا ... :( حتى ما غلب حالو يحكيها شوي ... يا حظي ويا هناي ...