ردوا على النسواين لنشوف شو اخريتها..

يمنع قراءة هذا البوست لمرضى السكري والضغط ووجع الرأس والأنف والأذن والحنجرة ... وامراض الفوبياز والنساء الحوامل والرضع واي شخص عصبي وما عندو طولة بال وبنرفز بسرعة .. كما ونحذر الاخوة المشوبين بضرورة اتخاذ الاجراءات الوقائية المناسبة من ارتفاع درجة حرارتهم بعد قراءة هذا البوست .. شاكرين لكم حسن تعاونكم ..

الرجاء قراءة هذا الاعلان :

لمن يهمه الامر.. انا ما بحب البوستات الطويلة ... بس للأسف مضطرة على هادا البوست .. فيرجى ان تعذرونا ..

update:انا ما رحت اليوم على الجامعة مو ناقصني انا شرشحة .. انا عنجد مكسرة وتعبانة الله يسامح الي كان السبب

لا مو معقول الي صار اليوم بعمان .. يعني خلينا نحط درجات الحرارة مؤقتا على جنب .. اليوم وانا رايحة على الجامعة الصبح ، نشامى الوطن واقفين على طول السايدين .. كل 100 متر واحد .. طبعا يعطيهم العافية .. لانو بالتأكيد عملهم شاق ومتعب .. يعني اول شي واقفين مو قاعدين تاني شي تحت الشمس وتحت الشوب الله يعينهم .. مو هون القصة يا ريت هون القصة .. طبعا انا بلشت اتسائل انو ليه كل هالاشي يعني .. هلا لما خلصت دوامي بالجامعة بدي اروح .. وقفت استنا باص مافي باص بناخد تكسي .. هاتي يجي باص او تكسي .. سلامتكم لا هادا ولا هادا .. بالاخير اجى النشمي ابن الحلال وصار ينادي المنادي :: الكنترول :: بهالناس : يا اخوان احنا ما حنوصل اي مكان بعد المدينة اخر مكان حنزلكم فيه هو المدينة .. انا عقلي الصغير بالحجم الكبير بالمفعول قرر انو اوكي بنزل هناك وباخد تكسي لبيتنا .. وبدأت تنفيذ الخطة ... ركبت هالباص .. مشى الباص فينا .. قبل الراي طلع طلعة ما حدا عارف هو وين رايح .. حكينا ماشي انخطفنا .. بس:: ان بعض الظن اثم :: المهم حضرتو ما بعرف الطريق .. وأخ من الي بيرد على النسوين اخ .. في وحدة حكتلو انها بتعرف .. وحضرتها مشت معاه ودلتو لما وصلت باب بيتها نزلت وحكتلو شكرا .. :: يعطيكي العافية يختي مشكورة:: وبعدين يا عمي بنا نطلع من هالمنطقة احنا وين : انتو بتلاع العلي طبعا انا عصبت :: حبيبي ابو سمرة شو وصلنا على تلاع العلي وحد ربك !!!:: المهم حضرتها نزلت وبعديها بلش عمو يلاخم .. تيجي يمين نروح شمال .. وعلى هالحال 10 دقايق طبعا بالاخير نزل كل الركاب .. طيب يا عمي احنا بنات بشوارع ما بنعرفها .. يعني رجعنا على القليل على الدوار مو طالبين اكتر من هيك .. قال لا انزلو ..:: طلع مو نشمي:: المهم انا ومجموعة طبعا ما بعرفها من البنات قررنا ناخد تكسي يوصلنا على القليل للدوار .. يعني احنا مو عارفين الطريق ..المهم هاتي تكسي يوقف ... مشينا مشينا مشينا .. ولا هو احنا قدامنا السيفوي .. عليم الله لما شفنا السيفوي اني كنت بدي انط من الفرح .. انا اعلم اين نحن .. المهم ومن السيفوي نستنى تكاسي على الفاضي .. وبالنهاية انفضت الجموع الغفيرة كل وحدة على بيتها .. مشيت تحت الشمس حوالي 45 دقيقة طبعا لا ما اكلت هوا ابدا كزب هادا الحكي .. تلفونات ما خليت مع كل العالم حكيت ما حدا فاضي وازا فاضين مو عارفين يوصلوني .. بالله هادا حكي؟؟ الناس مرمية بالشوارع متل الشرايط وسوري على هالتعبير كل واحد تلفونو على دانو بيحكي بدو يدبر توصيلة .. والناس كبار وصغار ماكلين هوا .. انا الحمد لله بيتي قريب يعني بساعة الا ربع كنت بالبيت بس البنات التانيات لو بدهم يمشو لبيوتهم على امل انهم يلاقو تكاسي متل ما صار معي ما حيلاقو وحيكملو لبيوتهم بساعتين ازا مو اكتر .. الله يعين ..يعني اهلا وسهلا بضيف الاردن بس شو دخل الطرق تتسكر .. عنجد تعبت ..انا هلا طولت عليكم .. سوري بس مدايقة كتير من الي صار .. طول الطريق وانفي ينزف دم وراسي يدور ومولعة وحاسة انضربت انضربت .. والله اني عنجد خايفة من هالشغلة .. اكتر من مرة فقدت توازني وانا ماشية وبعيد عنكم مو لابسة شوز مناسب للمشي ابدا .. بعين الله ..

شكر وتقدير: لكل حدا ساهم في هذا العمل ..من اول واحد شرشحني اليوم لاخر واحد ..كما واشكر صاحب الباص الي تركنا بمكان ما بعرفو واوجه شكر معطر بالفل والياسمين الى البنت الي حكتلو انها بتعرف الطريق بس للأسف وصلتنا على بيتها وحكتلنا بي باي ... عشان هيك الرجال لازم يكونو تقال ...واشكر مالك السيفوي الي بنا السيفوي عشان هو كان عارف بيوم من الايام شلتة البنات التاهية حتستدل فيه ..

كما واوجه شكر خاص لجميع المشاهدين والقارئين وبتعرفو تكملة الباقي عمرنا ما بنخلص ..

عبرة اليوم او الدرس المستفاد من القصة : لا ترودو على النسوين بالطرق .. فإن العاقبة شديدة